Թոռնիկ Ալիյանն առերես հարցաքննության ժամանակ հերքել է, որ Չալաբյանն իրեն երբևէ որևէ նյութական շահագրգռություն է առաջարկել․ փաստաբան (տեսանյութ)

Ավետիք Չալաբյանի փաստաբանական խմբի անդամ Վարազդատ Հարությունյանը վստահեցնում է, որ Չալաբյանի նկատմամբ հարուցված քրեական գործը հորինված է, որի առնչությամբ իրականացվում է, իր իսկ խոսքով, բռի և լկտի քաղաքական հետապնդում։

Այս մասին փաստաբանն ասաց հրավիրված ասուլիսի ժամանակ և պարզաբանեց, թե ինչով է պայմանավորված իր որակումը։

Վարազդատ Հարությունյանը հիշեցրեց հայտնի ձայնագրությունը, որտեղ Թոռնիկ Ալիյանը սադրանքի է ենթարկում զրուցակիցներին և անընդհատ խոսում է փողի մասին, որին ի պատասխան Ավետիք Չալաբյանը շատ հստակ ասում է, որ միգուցե գոյատևելու համար ֆինանսն է կարևոր, բայց մարդավարի ապրելու համար ոչ նյութական արժեքներն են կարևոր. «Այստեղ ունենք մի դերակատար՝ Թոռնիկ Ալիյանը, որը ենթադրյալ հնարավոր նյութական շահագրգռության հասցեատերն է, բայց շատ կարևոր է, որ նույնիսկ Թոռնիկ Ալիյանն առերես հարցաքննության ժամանակ չի պնդել, անգամ հերքել է, որ Ավետիք Չալաբյանն իրեն երբևէ որևէ նյութական շահագրգռություն է առաջարկել որևէ հանրահավաքի մասնակցելու նպատակով: Քրգործով չկա նաև որևէ այլ անձի կողմից նման պնդում»,- ասաց փաստաբանը:

Նա նկատեց, որ Չալաբյանին մեղսագրվել է հատկապես 163-րդ հոդվածի 3-րդ մասի երկրորդ կետը, որովհետև կալանք կարելի է կիրառել միայն այն հանցագործությունների դեպքում, որոնց համար պատիժը նախատեսում է մեկ տարուց ավելի ազատազրկում:

Վարազդատ Հարությունյանը նաև ներկայացրեց, թե ինչ է տեղի ունեցել իրականում։

Մանրամասները՝ տեսանյութում․