Դու սուտասան ես, եթե չհրապարակես որևէ փաստաթուղթ, որտեղ սևով սպիտակի վրա գրված է, որ պետք է լիներ Մեղրիի փոխանակում․ Խամոյանը՝ Փաշինյանին

Գիտե՞ք` ես այնքան շատ եմ խոսել Մեղրիի մասին, Քի Վեսթի մասին։ Ինչի՞ մասին է եղել Քի Վեսթը։ Որոշակի ճշգրիտ ձևակերպումներ, ի դեպ, երեկ ինքը (Փաշինյանը) տվել է։ Այս մասին լրագրողների հետ զրույցում ասաց «Հայաստան» խմբակցության պատգամավոր Ագնեսա Խամոյանը։

Մանրամասնելով, Խամոյանն ասաց․

«Քի Վեսթով Ադրբեջանն Արցախը՝ Շուշիով և Հադրութով, Լաչինի միջանցքով (այն Լաչինի միջանցքը, որը նա պատրաստվում է հանձնել ադրբեջանցիներին) ճանաչում էր Հայաստանի մաս։ Ի՞նչ էր դրա դիմաց ստանում Ադրբեջանը։ Ստանում էր՝ այո՛, ճանապարհ, բայց դա ընդամենն էսկադաներ պետք է լինեին և ստորգետնյա անցումներ։ Այսինքն՝ դա Մեղրիի փոխանակում չի՛ եղել։ Եվ Ադրբեջանի նախագահը՝ հայր Ալիևը, շատ հստակ, դեռ այն ժամանակ արձանագրել է։ Ինչո՞ւ չի համաձայնվել այդ տարբերակին, որով, Նիկոլ Փաշինյանի մեկնաբանմամբ՝ երկրորդ նախագահն Արցախը ճանաչում էր Ադրբեջանի մաս։ Ինչո՞ւ չի համաձայնել այդ դեպքում Ալիևը, եթե այդքան լավն էր։ Ալիևը բառացի ասել է՝ ինձ իմ ընտանիքը, ադրբեջանցի ժողովուրդը չի հասկանա, եթե Արցախը հանձնեմ։ Ի դեպ այն, ինչ հետո արեց Նիկոլ Փաշինյանը»։

Հարցին, թե Մեղրիի թեմայով փորձում են շեղել Բերձորի հանձնման ներքո, Խամոյանը նշեց, որ Բերձորի թեման ամենաառանցքային, կարևոր թեման է այսօր։ Եվ իհարկե, ակհայտ է, որ ցանկացած թեմայով փորձելու են շեղել։ Գուցե ինչ-որ մեկը փորձի մերկապար բեմադրել՝ հայ ժողովրդին Բերձորի թեմայից շեղելու համար։ Խամոյանը հավաստիացնում է, որ միանշանակ դա չի ստացվելու։

«Մեղրիի հարցը, Քի Վեսթը պարբերաբար մանիպուլացվել է։ Բայց շատ հստակ եղել է արձանագրված»,- նշեց Խամոյանը և հավելեց, որ եթե Փաշինյանը նման պնդումներ է անում, ապա ինքը հրապարակայնորեն հայտարարում է․ «Դու սուտասան ես, եթե չհրապարակես որևէ փաստաթուղթ, որտեղ սևով սպիտակի վրա գրված է, որ պետք է լիներ Մեղրիի փոխանակում։ Խոսքն ընդամենը ճանապարհի մասին է եղել։ Ի դեպ, միջանցք էլ դա չի եղել։ Պիտի լիներ ճանապարհ։ Նորից եմ կրկնում՝ դրա դիմաց Ադրբեջանն Արցախը կորսված Շուշիով, Հադրութով և Լաչինի միջանցքով ճանաչում էր Հայաստանի մաս։ Եվ ինքը կերազեր, որ այսօր բանակցությունների սեղանին, նոյեմբերի 9-ից առաջ լինեին Մադրիդյան սկզբունքները։ Նա պարզապես կերազեր, որպեսզի Մադրիդյան սկզբունքներն ամրագրող որևէ փաստաթուղթ լիներ»։