Փաշինյանը խասյաթ ու ավանդույթ ունի, բանակցային պրոցեսի նրբությունները ճշտել Իլհամ Ալիևից՝ իր կիրթ ու կառուցողական գործընկերոջից․ Խամոյան

Նիկոլ Փաշինյանը, ժողովրդական լեզվով ասած, խասյաթ ունի, ավանդույթ ունի, բանակցային պրոցեսի նրբությունները ճշտել Իլհամ Ալիևից, որին որակում էր կիրթ և կառուցողական, իսկ մենք տեսանք, թե այդ կիրթ ու կառուցողական գործընկերը՝ Նիկոլ Փաշինյանի, ինչ բերեց հայ ժողովրդի գլխին։ Այս մասին լրագրողների հետ զրույցում ասաց «Հայաստան» խմբակցության պատգամավոր Ագնեսա Խամոյանը։

«Գիտե՞ք, Ղարաբաղյան հակամարտության վերաբերյալ նրա գիտելիքներն ինչպես տգետ կային, այդպես էլ տգետ մնացին։ Ես չեմ վախենա այս ձևակերպումն օգտագործելուց։ Կամ գոյություն ունի երկրորդ տարբերակը՝ նա բանակցային փաստաթղթերը կարդացել և չի կարողացել հասկանալ, կամ կարդացել է այն, ինչ հետո իրեն վերելակում, այլ սենյակում պատմել է Իլհամ Ալիևը։ Որևէ երկրի ղեկավարի արած-չարածի, բանակցային պրոցեսի թողած առավելությունների և բացթողումների մասին կարելի է դատել նրանից, թե նա ինչ ժառանգություն է ստացել և ինչպիսի ժառանգություն է թողել իր հաջորդին»,-նշեց Խամոյանը։

Խոսելով 1998թ․-ի իրադարձությունների մասին՝ Խամոյանը նշեց, որ ՀՀ երկրորդ նախագահ Ռոբերտ Քոչարյանը ստացել է բանակցային պրոցես, երբ Լիսաբոնի տխրահռչակ գագաթնաժողովից հետո, միջազգային հանրությունը, այդ թվում՝ ԵԱՀԿ Մինսկի խմբի համանախագահող երկրները ճանաչում էին Ադրեբեջանի տարածքային ամբողջականությունը, Արցախն էլ՝ Ադրբեջանի կազմում։

«Համառ բանակցային պրոցեսից հետո, 10 տարվա ընթացում, նախագահ Քոչարյանն իր հաջորդներին է փոխանցել բանակցային պրոցես, ժառանգություն, փաթեթ, որտեղ այդ նույն միջազգային հանրությունը, ԵԱՀԿ Մինսկի խմբի անդամ երկրները ճանաչել են Արցախի ինքնորոշման իրավունքի իրացումը։ Փաշինյանը հերթական անգամ փորձում է, շարունակում է սնուցել այն թեզը, որ խեղճ հարիֆն ի՞նչ աներ, իր ջեբը գցեցին։ Նա ուռճացնում է այդ թեզը և փորձում իրեն հավատացողներին ներարկել, որ ինքը որևէ բան չէր կարող անել, որովհետև ինքը վատ ժառանգություն էր ստացել։ Գիտե՞ք, սա կարող էր տրամաբանական լինել, եթե պատերազմը լիներ, օրինակ՝ իր պաշտոնը ստանձնելուց հետո՝ մեկ ամսվա կամ երկու ամսվա ընթացքում։ Հասկանալի էր, չէ՞, լինելու, որ իրավիճակն էնպիսին էր, որ նա դա պարզապես ժառանգություն ստացավ։ Սակայն դա տեղի ունեցավ 2 տարի անց։ Իսկ այդ երկու տարվա ընթացքում նա ինչո՞վ էր զբաղված, հիշո՞ւմ եք։ Երբ նրան խորհրդարանում հարցնում էին, թե բանակցային պրոցեսից ինչ կարող եք հայտնել, երբ Լավրովը 2019-ին հայտարարում էր, որ փուլ առ փուլ փաթեթ է դրված բանակցությունների սեղանին, ինքն ու իր ամբողջ ապարատը ստում էին հայ ժողովրդին։ Նա հայտարարում էր, որ ինչ ուզեմ՝ այն էլ կբանակցեմ։ Մատ էր թափ տալիս պատգամավորների վրա։ Ասում էր՝ որևէ մեկդ ինձ չկաշկանդի։ Եվ ի վերջո՝ մի շատ կարևոր նրբերանգ այդ պատմության մեջ․ մարդը 2019թ․-ին հայտարարել է, որ ես բանակցությունները սկսում եմ իմ սեփական զրո կետից»,- նշեց Խամոյանը և հավելեց, որ Փաշինյանը ջուրն է գցել ամբողջ բանակցային գործընթացը։