Նիկոլն ավելի վտանգավոր բան արեց․ Արմեն Աշոտյան

Երեկ Նիկոլ Փաշինյանը կրկին փորձում էր շոու բեմադրել Ազգային ժողովում և նախկինացավով իր վրայից փորձում էր մաքրել դավաճանի խարանը, այն խարանը, որը դաջվել է իր ճակատին՝ նոյեմբերի 9-ից հետո։ Այս մասին «Հայելի» ակումբում ասաց ՀՀԿ փոխնախագահ Արմեն Աշոտյանը։ 

Աշոտյանի խոսքով՝ Փաշինյանի ուշքն ու միտքն այն է, որ նա պատմության մեջ և ընթացիկ քաղաքական իրավիճակներում չմնա որպես դավաճան և փորձի հիմնավորել, որ Արցախը նախկինները տվել են և այլն, և այլն։

«Անբարոյական կատարյալ ստերի հերթական ժողովածուն էր հրապարակում, թեպետ որևէ նոր բան չէր դայլայլում, որովհետև այդ ամբողջ ստերի, կեղծիքների, մանիպուլյացիաների շարքը մենք լսել էինք, և երեկ նա փորձում էր ռեմիքս անել։ Այստեղ մի կարևոր հանգամանք կա, թե այս երկու օրը հանրային դաշտում ի՞նչ է քննարկվում։ Քննարկվում էր ընդդիմության որոշումը՝ հետագա քայլերի, վրանները հանելու և այլն, և այլն։ Նիկոլի պրիմիտիվ քաղաքական բնազդները հաշվի առնելով՝ կանխատեսվում էր, որ նա հենց այդ պահին ամբիոնը կօգտագործի ընդդիմության այդ քայլը քննարկելու համար։ Բայց նա ավելի վտանգավոր բան արեց, և ես ուզում եմ, որպեսզի դուք հասկանաք՝ խի՞։  Օրինակ՝ խի՞ Նիկոլը չխոսեց՝ ընդդիմությունը մաշվում է․․․ վրանները, ֆլանը, ֆստանը․․․Իրենց սպասարկող մամուլը, իրեն սպասարկող լորձաթաղանթային ուժերը, գործիչները և այլն։ Բոլորն այդ գծի մեջ են։ Խի՞ Նիկոլն այդ գծի մեջ չէր։ Շատ պարզ։ Նա հասկանում է, որ դա առաջինը ընդդիմության պայքարի հերթական փուլի ազդարարումն էր։ Նա հասկանում է, որ ընդդիմության պայքարի վտանգը ոչ թե վրաններից է, այլ՝ օրակարգից։ Այսինքն՝ Արցախի առաջխաղացման, հետապնդման օրակարգն է, ոչ թե Ֆրանսայի հրապարակում վրաններ տեղադրելը»,- նշեց Աշոտյանը և փաստեց, որ Փաշինյանն ԱԺ-ում թիրախավորեց հենց այդ օրակարգը։ 

Աշոտյանի խոսքով՝ Նիկոլին շատ բան կարող ենք ասել և տեղին ասել, բայց չենք կարող չընդունել, որ նա ունի բնազդներ։

«Այդ բնազդների մեջ նա ջոկում է իր հիմնական սպառնալիքները, իրեն սպառնացող վտանգները և խոսում հենց դրանց մասին։ Ապամոնտաժումից Փաշինյանն ամենևին էլ չի ուրախանում, քանի որ շատ լավ հասկանում է՝ վրանները ձև էին, ֆորմա էին, փուլ էին Արցախի համար մեր պայքարում»,- ասաց Աշոտյանը։