2018թ-ին ո՞վ կպատկերացներ, որ ՀՀԿ-ն հազարավոր քաղաքացիների երթ կղեկավարեր, իսկ Նիկոլը կպախկվեր՝ ընդդիմադիր հանրապետականներից հազարավոր ոստիկանների թիկունքում․ Շարմազանով

Այս իշխանությունների ազգակործան քաղաքականությունը չի սկսվել նոյեմբերի 9-ից։ Նոյեմբերի 9-ը եղել է դրա արձանագրումը։ Այդ քաղաքականությունը սկսվեց մայիսից, երբ իշխանության եկան ներկայիս իշխանությունները։ Այս մասին «Հայելի» ակումբում ասաց ՀՀԿ խոսնակ Էդուարդ Շարմազանովը։ 

Շարմազանովը խոսեց այս շարժման ձեռքբերումների մասին։ Նա մասնավորապես նշեց․ 

«Համար 1-Նիկոլ Փաշինյանը Հայաստանում իշխանություն չունի։ Նա մնացել է իր ՔՊ-ական խունտայի փոքր հատվածի և ոստիկանական կարմիր ու սև բերետավորների հույսին։ 2018թ-ին ո՞վ կպատկերացներ, որ ՀՀԿ-ն հազարավոր քաղաքացիների երթ կղեկավարեր, Կառավարության դիմաց կպահանջեր Նիկոլի հրաժարականը, կգոռար «Նիկո՛լ, հեռացիր», «Նիկո՛լ, իջիր» ու Նիկոլը կպախկվեր՝ ընդդիմադիր հանրապետականներից հազարավոր ոստիկանների թիկունքում։ Նիկոլի քաղաքական իշխանությունը 10 կոպեկի արժեք չունի։

Համար 2- Այս շարժումը ցույց տվեց, որ Նիկոլ Փաշինյանին կա այլընտրանք, որ Նիկոլ Փաշինյան և Հայաստանի Հանրապետություն տարբեր հասկացություններ են։ Շարժումը ցույց տվեց նաև, որ բոլոր այն կարծիքները, որ ազգային գաղափարը, գաղափարախոսությունը, Արցախի համար պայքարը ոչ թե քնել և մահացել է, այլ նոր թափ է ստացել, որ դեռ կան քաղաքացիներ, որոնց չեն հանդուրժելու Հայաստանի թուրքացումն ու ադրբեջանացումը։

Համար 3- Շարժումը ցույց տվեց, որ Հայաստանում համատարմագրված միջազգային, ավելի շատ՝ արևմտյան կառույցները և սուտի իրավապահ կազմակերպությունները որևէ առնչություն չունեն ժողովրդավարության և մարդու իրավունքների հետ։ Նրանք լուռ էին, երբ քաղաքացիներ էին բերման ենթարկվում ձերբակալվում-կալանավորվում, էլ չեն ասում՝ կրակում էին։ Փաշինյանն ապացուցեց, որ ինքը ժողովրդավարության հետ որևէ առնչություն չունի։ Նա գնում է Հայաստանը բռնապետության վերածելու ճանապարհով»։