Երաժշտական և արվեստի շուրջ 60 դպրոցներ մինչև տարեվերջ կիրականացնեն համատեղ ծրագրեր. ԿԳՄՍՆ

ՀՀ կրթության, գիտության, մշակույթի և սպորտի նախարարության աջակցությամբ իրականացվող Երևանի և ՀՀ մարզերի երաժշտական և արվեստի դպրոցների փոխգործակցության «Քույր դպրոցներ» ծրագիրը շարունակվում է:

ԿԳՄՍՆ-ից հայտնում են, որ հունիսի 1-ից մեկնարկած ծրագրի հերթական կանգառը Երևանի Կ. Սարաջյանի անվան երաժշտական դպրոցն էր, որտեղ ՀՀ Գեղարքունիքի մարզի Մարտունի և Վարդենիկ համայնքների երաժշտական դպրոցների սաները հաջողությամբ ներկայացել են իրենց կատարումներով:

Հունիսի 7-ից 8-ը ՀՀ Սյունիքի մարզում հյուրընկալվել են Երևանի Ալ. Հեքիմյանի անվան երաժշտական դպրոցի սաներն ու մանկավարժները: Գորիսի Ա. Սաթյանի անվան երաժշտական դպրոցում կայացած համերգին հաջորդել է երևանաբնակ երեխաների այցելությունը Ակսել Բակունցի տուն-թանգարան: Երեխաներից շատերն առաջին անգամ էին այցելում Սյունիքի մարզ, և ջերմ ընդունելությունից տպավորված երևանցի պատանիները կսպասեն աշնանը կայանալիք պատասխան այցին:

Հունիսի 8-ին Երևանում կայացել է ծրագրի միանգամից 3 միջոցառում. Երևանի Չայկովսկու անվան միջնակարգ երաժշտական մասնագիտական դպրոցի մեծ դահլիճը տրամադրվել էր գյումրեցի պատանիներին: Գյումրու թիվ 6 երաժշտական դպրոցի սաները հաջողությամբ ելույթ են ունեցել: Չայկովսկու անվան դպրոցի տնօրեն Մ. Կոստանդյանը տեղեկացրել է, որ աշնանը դպրոցը մեծ համերգային ծրագրով կայցելի Գյումրի: Գյումրի քաղաքի պատվիրակությունն այցելել է հիմնադրման 50-ամյակը նշող Ժամանակակից արվեստի թանգարան, որտեղ երեխաները ծանոթացել են Մինաս Ավետիսյանի, Աշոտ Հովհաննիսյանի, Մարտին Պետրոսյանի, Հակոբ Հակոբյանի, Գայանե Խաչատուրյանի, Վրույր Գալստյանի, Ռուդոլֆ Խաչատրյանի և այլ նշանավոր նկարիչների աշխատանքներին:

Հունիսի 8-ին ՀՀ Կոտայքի մարզի Եղվարդ և Քասախ համայնքների արվեստի դպորցների սաներն ու մանկավարժները հյուրընկալվել են Երևանի Մ. Մալունցյանի անվան արվեստի դպրոցում: Մինչ դպրոց այցելությունը, երեխաների համար շրջայց է կազմակերպվել «Էրեբունի» պատմահնագիտական արգելոց-թանգարանում: Մ. Մալունցյանի անվան արվեստի դպրոցում կայացած վարպետության դասերից հետո լեփ-լեցուն դահլիճում հյուրերը ելույթ են ունեցել բազմաժանր համերգային ծրագրով:

Ծրագրի հաջորդ միջոցառումն իրականացրել են ՀՀ Արարատի մարզի Փոքր Վեդիի, Արևշատի և Արարատի արվեստի դպրոցները: Երևանի Ղ. Սարյանի անվան արվեստի դպրոցում Արարատի մարզի երեխաները փայլուն ելույթ են ունեցել՝ ամփոփելով 2021-2022 ուսումնական տարվա ձեռքբերումները:

Երևանի և ՀՀ մարզերի երաժշտական և արվեստի դպրոցների փոխգործակցության «Քույր դպրոցներ» ծրագրում այս տարի ընդգրկվել են հանրապետության երաժշտական և արվեստի շուրջ 60 դպրոցներ, որոնք մինչև տարեվերջ կիրականացնեն համատեղ ծրագրեր, միջոցառումներ, փոխայցելություններ:

Ծրագրի շրջանակում արտադպրոցական դաստիարակության և գեղարվեստական կրթության շահառուները, ոլորտի պատասխանատուներն ու մանկավարժները միավորում են ջանքերը՝ ոլորտի խնդիրների վերհանման, դրանց լուծման տարբերակների առաջարկման, մշակութային համաչափ զարգացման, ինչպես նաև մշակութային կրթության ոլորտի արդյունավետության բարձրացման ուղղությամբ:

Ծրագիրն իրականացվում է Երևանի Ալ. Հեքիմյանի անվան երաժշտական դպրոցի նախաձեռնությամբ՝ ՀՀ կրթության, գիտության, մշակույթի և սպորտի նախարարության աջակցությամբ: