Օլիգարխների ու պաշտոնյաների երեխաները հիվա՞նդ են ծնվում, որ բանակ չեն գնում. (տեսանյութ)

ԳԽ նախկին պատգամավոր Ազատ Արշակյանը դրական է գնահատում վերջին ռուսական զենքի հոսքը Հայաստան:
«Շատ լավ է, ինչքան շատ բերեն, ու շատ թարմացնեն` մեր օգտին է…»,- լրագրողների հետ հանդիպման ժամանակ իր դիրքորոշումը հայտնեց Ազատ Արշակյանը:

Նա չի հավատում, որ Ռուսաստանի և Թուրքիայի միջև կարող է պատերազմ լինել:

«Թուրքիան` ՆԱՏՕ է, և ես չեմ հավատում, որ Ռուսաստանը կարող է պատերազմել ՆԱՏՕ-ի դեմ»,- ասաց բանախոսը` հավելելով, որ 2 ռեգիոնալ գերտերություններ մրցակցում են, որի մեջ նա պանթուրքիզմի տարր է նշմարում:

ԱԱԾ նախկին պաշտոնյա Գուրգեն Եղիազարյանը ևս դրական է համարում ռուսական զենքով Հայաստանի սպառազինումը:

«Ադրբեջանը նման է գյուրզա օձի, չնայած որ գյուրզան նախազգուշացնում է հարձակման մասին, իսկ մեր հակառակորդը` ոչ: Այնպես, որ պետք է ամեն րոպե պատրաստ լինենք հարվածի»,- ասաց Եղիազարյանը:

Բանախոսների դիտարկմամբ, հարկավոր է մարզել սահմանում կանգնած զինվորներին, որպեսզի շատ զոհեր չտանք:

«Ամեն մի զինվորի մահով գեներալների պագոնները պետք է պոկվեին, թնդանոթի միս են դարձրել մեր տղաներին…»,- ասաց Ազատ Արշակյանը:

Գուրգեն Եղիազարյանն էլ նկատեց, որ զորակոչիկների ցուցակները նայելիս, պարզվում է, որ բոլոր օլիգարխների ու հարուստների երեխաները հիվանդ են:

«Ի՞նչ է, նրանք հիվա՞նդ են ծնվում. եթե բոլոր պաշտոնյաները հիվանդոտ երեխաներ են ունենում, ուրեմն պրոբլեմ ունեն, պետք է բուժվեն»,- ասաց Եղիազարյանը:

Բանախոսները նկատեցին, որ մենք այդքան երեխա չունենք զոհ տալու համար:

Մանրամասները` տեսանյութում