ԳՇ պետի պաշտոնը դարձնելով Պաշտպանության նախարարի առաջին տեղակալ` մենք քաղաքականացնում են ԳՇ պետի պաշտոնը․ Սեյրան Օհանյան

Իշխանություններն այսօրվա Պաշտպանության մասին օրենքին չեն տիրապետում և չեն հասկացել, որ 2008թ․-ին, երբ Պաշտպանության մասին օրենքը փոխվեց, ինչ նշանակություն ուներ դա։ Այս մասին լրագրողների հետ զրույցում ասաց «Հայաստան» խմբակցության պատգամավոր Սեյրան Օհանյանը։ 

Օհանյանի խոսքով՝ մեր Զինված ուժերի ամբողջ պատմության ընթացքում պաշտպանության նախարարների պաշտոնները քաղաքացիական պաշտոններ են եղել, և բացի Վաղարշակ Հարությունյանից, որը 1999թ․-ին նշանակվեց, մնացած բոլոր պաշտպանության նախարարները, այդ թվում՝ ինքը, քաղաքացիական անձնավորություն են եղել, այսինքն՝ հանդիսանալով քաղաքական թիմի անդամ, նշանակվել է Պնախարար։

«2008թ․-ի դեկտեմբերին, հանրապետության նախագահի ստորագրությամբ, Պաշտպանության մասին օրենքով, նախարարի և Գլխավոր շտաբի պետի պարտականությունները հստակ առանձնացվեց։ Նախարարը պատասխանատու էր, որպես քաղաքական թիմի անդամ, պաշտպանական քաղաքականության, դրա շրջանակներում ռազմաքաղաքական իրավիճակի գնահատման, կադրային քաղաքականության, ռազմական կրթության և Զինված ուժերի համակողմանի ապահովում (ֆինանսական, նյութատեխնիկական) խնդիրն էր։ ԶՈւ ԳՇ-ի պետն առաջ առաջին տեղակալ էր, բայց ՊՆ-ի ենթակայությամբ առանձնացված մարմնի ղեկավար դարձավ, որը պատասխանատու էր ԶՈւ-ի զորային կառույցի համար, այսինքն՝ մարտական բոլոր կառուցվածքային ստորաբաժանումների մարտական խնդրի իրականացման»,- նշեց Օհանյանը և հավելեց, որ կան փոփոխություններ, որոնց մի մասի հետ իրենք համաձայն են, իսկ որոշ մասի հետ՝ ոչ։

Օհանյանի խոսքով՝ հենց Գլխավոր շտաբի պետի պաշտոնը դարձնելով Պաշտպանության նախարարի առաջին տեղակալ, մենք քաղաքականացնում են ԳՇ պետի պաշտոնը, որովհետև ինքը պետք է իրականացնի զորային կառույցի ղեկավարումը։