Հայաստանում անվավեր կհամարվեն 300 հազար դրամը գերազանցող կանխիկ գործարքները

ՀՀ Ազգային ժողովը հունիսի 9-ի արտահերթ նիստում հավանություն  է տվել «Անկանխիկ գործառնությունների մասին» օրենքում փոփոխություններին, որով Հայաստանում 300 հազար դրամից ավելի կանխիկ եղանակով կատարված գործարքներն այսուհետ կճանաչվեն անվավեր։

Այսպիսով, այս տարվա հուլիսի 1-ից շարժական եւ անշարժ գույքի ձեռքբերման կամ վարձակալության, ինչպես նաեւ փոխառության գործարքները պետք է իրականացվեն անկանխիկ եղանակով, մասնավորապես, եթե գործարքի գումարը գերազանցում է 300 հազար դրամը։ Սույն օրենքի պահանջների կատարումն ապահովելու նպատակով կառավարությունը կներդնի նոր մեխանիզմ։ Ըստ դրա՝ վերը նշված պահանջները չկատարելու դեպքում գործարքն ի սկզբանե կհամարվի անվավեր։