Հետո չպարզվի, որ մենք էսպես ճոխ-ճոխ ասում ենք, բայց սահմանափակումներ ենք գրել հետևի տողում․ Փաշինյանը՝ հիփոթեքային սուբսիդավորման մասին (տեսանյութ)

Եթե քաղաքացին գնում է բանկ և ասում, որ ուզում եմ սահմանամերձ բնակավայրում տուն կառուցել և 25 մլն դրամի հիփոթեքային վարկ եմ ուզում, հիմա այդ 25 մլն դրամի վարկին կառավարությունը ո՞նց է մասնակցում: Այսօր՝ հունիսի 9-ին, կառավարության նիստում այս հարցն ուղղեց Նիկոլ Փաշինյանը՝ Աշխատանքի և սոցիալական հարցերի նախարար Նարեկ Մկրտչյանին։ Վերջինս ներկայացնելով ՀՀ սահմանամերձ բնակավայրերում ընտանիքների բնակարանային մատչելիության ապահովման պետական աջակցության 2022-2024 թվականների ծրագիրը, նշեց, որ կառավարությունը պարտավորվում է ընտանիքներին սուբսիդավորվել 12 մլն․ դրամի չափով։

Արձագանքելով Փաշինյանի հարցին՝ նախարարը նշեց, որ այդ 25 մլն դրամի 12 մլն դրամը և դրա 12 տոկոսի չափով տոկոսագումարները պետությունն է մարում՝ 10 տարվա ընթացքում:

Փաշինյանը նկատեց, որ ըստ էության, այդ դեպքում բանկի ռիսկը մնում է  այն 13 մլն-ը, որը վճարելու է շահառուն։

Նախարարն էլ ընդգծեց, որ այս ծրագրի շահառուներ են ոչ միայն սահմանամերձ բնակվայրերի բնակիչները, այլև ցանկացած ամուսնական զույգ, որոնցից առնվազն մեկը ՀՀ քաղաքացի է:

«Օրինակ, եթե Երևանի որևէ բնակիչ ցանկություն կունենա սահմանամերձ բնակավայրում անհատական բնակելի տուն կառուցել, նա կարող է այս ծրագրի շահառու դառնալ»,- ասաց նա՝ հավելելով․ «Եթե ասենք քաղաքացին 20 մլն դրամի վարկ է վերցրել, որից 12 մլն-ը փակում է պետությունը, և այդ ընթացքում ունենում է երրորդ երեխան, այստեղ աշխատում է նաև մյուս ծրագիրը և ևս 2 մլն դրամ նրան տրամադրվում է»:

Փաշինյանը նկատեց, որ եթե այդ քաղաքացին զինվորական էլ լինի, էլ ավելի մեծ կլինի աջակցությունը. «Էս պահերը մենք ճիշտ ենք, չէ՞, հասկանում: Հետո չպարզվի, որ մենք էսպես ճոխ-ճոխ ասում ենք, բայց սահմանափակումներ ենք գրել հետևի տողում»: