Առավոտը բարի չէր ոստիկանության համար. Վահե Գրիգորյան

Դեռևս 2021թ մարտի 24-ին ՎԴ/7589/05/20 գործով ՀՀ վարչական դատարանը իմ կողմից կազմված վիճարկման հայցի հիման վրա բավարարել էր քաղաքացի Շահանե Ստեփանյանի պահանջը և անվավեր էր ճանաչել դիմակ չկրելու համար ոստիկանության կողմից նրա նկատմամբ 10000 ՀՀ դրամի չափով տուգանք նշանակելու մասին 22.08.2020 թվականի թիվ 3462 որոշումը: Այս մասին ֆեյսբուքյան իր էջում գրել է իրավաբան Վահե Գրիգորյանը: 

«Ոստիկանությունը, որոշել էր չհամակերպվել իր պարտության հետ և, պետական միջոցներից վճարելով 10000 դրամ պետտուրք, բողոքարկել էր այս վճիռը վերաքննիչ վարչական դատարան:

Դե, Մենք էլ հավուր պատշաճի պատասխանել էինք ոստիկանության անհեթեթ վերաքննիչ բողոքին:

Արդեն երեկ վերաքննիչ դատարանը հրապարակեց սույն գործով իր որոշում, որով մերժել է ոստիկանության բողոքը և անփոփոխ է թողել առաջին ատյանում Մեր հաղթանակը:
Այսինքն ոստիկանությունը պետական միջոցներից ծախսեց 10000 դրամ` պետտուրք վճարելու համար, ինչպես նաև կատարեց այլ ծախսեր, անհարկի ծանրաբեռնեց դատական համակարգը միայն զուտ նրա համար, որպեսզի հերթական անգամ համոզվի իր սխալականության հարցում և ընդունի իր պարտությունը:

Ամենակարևորը, որ քաղաքացի Ստեփանյանի իրավունքը մնաց պաշտպանված:

Շնորհակալություն»: