Տնտեսական երկնիշ աճի փոխարեն՝ երկնիշ գնաճ․ Նիկոլը մոռացա՞վ «կանաչ ժիգուլի» հրելը

Վերջին 10 տարվա ընթացքում, այս տարի՝ 2022-ին, Հայաստանում գնաճի ամենաբարձր ցուցանիշն է գրանցվել։

Վիճակագրությունը ցույց է տալիս, որ անցած տարվա ընթացքում, միայն սննդամթերքի գնաճը, որոշ ամիսներին անցնում էր 17 տոկոսից․ բանջարեղենը թանկացել է 40 %-ով շաքարավազը՝ շուրջ 20, հացաբուլկեղենն ու ձավարեղենն՝ ավելի քան 10 տոկոսով։ Կաթնամթերքի, պանրի և ձվի գները միասին վերցված ավելացել են 11,2 տոկոսով։ Շատ՝ ավելի քան 30 տոկոսով, ձուկն ու ծովամթերքն է թանկացել։ Մսի գներն ավելացել են 7,5 տոկոսով․․․

Այնպես որ, գնաճային հիթ շքերթի առաջին հորիզոնականը զբաղեցնում է սննդամթերքի թանկացումը, որն ամենազգալի ազդեցությունն է թողնում շարքային քաղաքացու ընտանեկան զամբյուղի վրա։

Եթե մարդիկ կարող են մի կերպ յոլա գնալ առանց կահույք փոխելու, տունը վերանորոգելու, առանց նոր հագուստի և անգամ առանց կոմունիկացիոն որոշ հարմարությունների, ապա առանց սնվելու երկար գոյատևել չեն կարող․․․ 

Ու, չնայած դրան, ոչ ոք դուրս չի գալիս թանկացումների դեմ բողոքի ու սարեր-ձորեր խոստացած կառավարությանը կանչի պատասխանատվության․․․

Ի դեպ, սա այն կառավարությունն է, որը ոչ վաղ անցյալում՝ 2018 թվականին, կանաչ ժիգուլի էր հրում՝ ի նշան թանկացումների դեմ բողոքի։ Սա այն դեպքում, երբ գնաճը, թեև զգալի էր, բայց սարսափելի չէր։ Այսօր արդեն թանկացումները ոչ միայն սարսափելի, այլև աննախադեպ են, բայց չկան «կանաչ ժիգուլի բրդողներ»․․․

Իսկ ավելի կոնկրետ, «կանաչ Ժիգուլի» հրողները դանդաղ, բայց կայուն ու սահուն քայլերով սողոսկել են իշխանական ապարատներ, կրում են այս ու այն պաշտոնյաների հագով կարված «կոստյումները», օգտվում նրանց համար նախատեսված «պադավատներից» ու թանկարժեք մեքենաներ քշում՝ մոռանալով կանաչ «Ժիգուլին» էլ, թանկացումներն ու ժողովրդին խոստացած ոսկե սարերն էլ․․․

Այն ժամանակ շարքային ընդդիմադիր, կանաչ «Ժիգուլի» հրող Նիկոլ Փաշինյանն էլ մոռացավ, թե ինչպես էր գոռում «իջեցում-իջեցում․․․»․․․ 

Հիմա արդեն վարչապետի պաշտոնում, ինքն է «Ժիգուլի» քշողն էլ, եղանակ փոխողն էլ ու գին թելադրողն էլ։ Ու, չնայած դրան, Փաշինյան Նիկոլը շարունակում է թոզ փչել մարդկանց աչքերին։ Նա կրկնում է նախկիններին՝ պնդելով, թե գնաճն արտաքին շուկայի թելադրանքն է ու դրա հետևանքը․․․

Ու ոչ մի խոսք՝ գնաճը զսպող օղակների մասին, ներքին արհեստական գնաճի մասին ու կառավարության բացթողումների մասին․․․

Իսկ ժողովրդի մոտ կարծես բթացում է․․․

Ամենօրյա գնումներից հետո՝ արձագանքը մեկն է «ինչ ահավոր գներ են» կամ «էս ոնց է թանկացել» և կամ էլ համանման այլ արտահայտություններ, բայց միայն այսքանը, ու ապրանքմերի «ահավոր» գները հասարակության համար հասնում են աչքի սովոր մակարդակի․․․

Արմինե Մկրտումյան