Մետրոպոլիտենի նոր տնօրենը «ռելսը շպալից չտարբերող» տնտեսագետ-բուսաբան է. նա Ավինյանի հերթական մտերիմն է. 168.am

Այսօր հայտնի դարձավ, որ Երևանի Կարեն Դեմիրճյանի անվան մետրոպոլիտենի նոր տնօրեն է նշանակվել Սահակ Վարդանյանը:

168.am-ի տեղեկություններով՝ Սահակ Վարդանյանի նշանակումը Մետրոպոլիտենի տնօրենի ժ/պ-ի պաշտոնում շոկի է մատնել աշխատակիցներին:

«Նախկինում բոլոր տնօրենները եղել են Մետրոյի աշխատակիցներ: Մետրոն ռազմական նշանակության օբյեկտ է. ինչպե՞ս կարելի է դիլետանտի նշանակել այդ պաշտոնում, և այն էլ այն դեպքում, երբ հիմա բուհ-երը Մետրոյի մասնագետներ չեն պատրաստում. դրանք պատրաստվում են տեղում՝ Մետրոյում աշխատելով, սովորելով ու փորձ կուտակելով: Այս մարդը Մետրոյի հետ կապ ունի այնքանով, որ ուղևոր է եղել: Շպալը ռելսից չտարբերող մարդն ինչպե՞ս կարող է աշխատել Մետրոյի տնօրեն»,- ասել է կայքի աղբյուրը:

Կայքի տեղեկություններով՝ Մետրոպոլիտենում ոչ ոք տեղյակ չի եղել ոչ նախկին տնօրենի ազատման, ոչ էլ նորի նշանակման նպատակի մասին:

«Հունիսի 2-ին ասացին՝ քաղաքապետը գալու է Մետրո: Եկավ, բերեց ներկայացրեց, ասաց՝ Ձեր նոր տնօրենի ժամանակավոր պաշտոնակատարն է»,- ասել է կայքի զրուցակից::

Մետրոն, ինչպես հայտնի է, ռազմական ու ռազմավարական նշանակության կառույց է, և պատահական չէ, որ դրա պահպանությունն իրականացնում է ոստիկանությունը: Ու հիմա անհասկանալի է, թե հերթական ոչ կոմպետենտ կադրը պետական կառավարման համակարգում, մասնավորապես, Մետրոյի նման կառույցում ինչպե՞ս պետք է կազմակերպի աշխատանքներն ու լուծի խնդիրներն արտակարգ իրավիճակների, այդ թվում նաև՝ հնարավոր պատերազմի ժամանակ:

Ի դեպ, մամուլը գրում է, որ Սահակ Վարդանյանը դե ֆակտո քաղաքապետ Տիգրան Ավինյանի հերթական մտերիմն է: