Ես այս պահին չունեմ պատասխան․ ՄԻՊ-ը՝ այն մասին, թե ինչու ցուցարարների դեմ արագ քրգործ հարուցվեց, իսկ ոստիկանների նկատմամբ՝ ոչ (տեսանյութ)

Մայիսի 30-ին, նախորդիվ մի քանի օրերի համեմատ,  էականորեն ամպլիտուդը լարման շատ ավելի բարձր էր: Այս մասին այսօր՝ հունիսի 2-ին, ԱԺ-ում լրագրողների հետ զրույցում նշեց Մարդու իրավունքների պաշտպան Քրիստիննե Գրիգորյանը:

Նա չի հերքում, որ անհամաչափ ուժ է կիրառվել, բայց, միևնույն ժամանակ, նկատում է, որ նաև քաղաքացիների կողմից կար շենք ներխուժելու մտադրություն։

«Մեր կողմից արձանագրված խախտումները կոնկրետ փաստերով, տեսանյութերով, հարցեր ուղղել ենք ոստիկանությանը, նաև պարզելու համար, թե մեր ներկայացրած փաստերով ոստիկանության ծառայողների նկատմամբ ինչ գործընթացներ են սկսվել: Պահանջել ենք, որ պատշաճ իրավական գնահատականի արժանանա: Մենք այստեղ չենք կարող որևէ ձևով առերևույթ ինչ-որ փաստերի հիման վրա պնդել, որ այստեղ քրեական արարքի տարրեր կան: Բնականաբար, օբյեկտիվ, բազմակողմանի և պատշաճ քննության ընթացքում դրանք պետք է բացահայտվեն»,- ասաց նա:

Հարցին, թե այդ ինչպե՞ս է լինում, որ քաղաքացիների նկատմամբ արագ քրգործ հարուցվեց, իսկ ոստիկանների մասով՝ դեռ ոչ, նա պատասխանեց.

«Ես այս պահին չունեմ պատասխան մայիսի 30-ի դեպքերի հետ կապված իմ դիմումին, թե ինչ միջոցներ են ձեռնարկվում, բայց բնականաբար, առերևույթ այդպիսի միջոցների գործադրումը առանց կենտրոնանալու և թելադրելու քրեական գործի նախաքննության ընթացքի նկատմամբ, պետք է դրանք արվեն պատշաճ ջանասիրությամբ, որպեսզի որևէ օբյեկտիվ դիտորդի մոտ այդպիսի տպավորություն չստեղծվի, որ կարող է երկու օրվա տարբերությամբ կանխակալ վերաբերմունք է դրսևորվում: Բնականաբար, մենք հետամուտ ենք լինելու բոլոր դեպքերի ընթացքին»: