Նախկինների կառուցած՝ ֆուտբոլի խաղադաշտերը «թավշյաների» անգործության հետևանքով շարքից դուրս են եկել (տեսանյութ)

Մանուկների տոնը նշում ենք առանց մանկական ժամանցային պատշաճ վայրերի ու խաղադաշտերի։

Դեռևս Երևանի քաղաքապետ Տարոն Մարգարյանի օրոք բարեկարգվեցին խաղահրապարակներ ու այգիներ՝ դրանք դարձնելով երեխաների համար շատ հարմար ժամանցի վայր։ Արդարության համար պետք է նկատել նաև, որ տեղադրված սղարանները, ճոճանակներն ու այլ սպորտային վարժությունների միջոցները վնասվելուն պես անմիջապես բարեկարգվում էին ու շարունակում ծառայել նախկինի նման։

Իսկ ավելի ազնիվ լինելու համար պետք է նկատել, որ 2018 թվականից մինչ օրս չի բարեկարգվել ոչ մի սարքավորում ու, առավել ևս, նորը չի տեղադրվել։ Ինչ վերաբերում է այգիներին, ապա քաղաքապետարանը դրանց հաշվին կարծես ջուր է տնտեսում։ Այգիներում խոտը չի ջրվում ու կանաչը չի պահպանվում:

NEWSPRESS.am-ի ուշադրության տակ են հայտնվել նաև Ավան վարչական շրջանի Նարեկացի թաղամասի և Հովհաննես Հովհաննիսյանի բակի ֆուտբոլային դաշտերը։ Վերջիններս, դարձյալ 2018 թվականից, չեն բարեկարգվել ու հայտնվել են անմխիթար վիճակում։ 

Հարկ է նկատել նաև, որ այս դաշտերը ժամանակին բարեկարգվել ու շահագործման են հանձնվել այն ժամանակ ՀՖՖ նախագահ Ռուբեն Հայրապետյանի հորդորով՝ Տարոն Մարգարյանի պաշտոնավորման օրոք։ 

Մանկապատանեկան ֆուտբոլի զարգացման նպատակով ՀՖՖ-ի և համայնքի համագործակցության արդյունքում վարչական շրջաններում ստեղծվել են բակային ֆուտբոլի դաշտեր։ Ռուբեն Հայրապետյանը վստահ է եղել, որ մարզադաշտերը բարեկարգելով՝ երեխաներին կարող են կտրել վատ սովորություններից ու ներգրավել խաղերում՝ նպաստելով նրանց առողջ ապրելակերպին։

Ստացվում է, որ, փաստորեն, Ռուբեն Հայրապետյանի նախաձեռնությամբ հիմք է դրվել  խաղադաշտերի կառուցապատման պիլոտային ծրագրին, որի շրջանակում կառուցվել է 54 խաղադաշտ ու տրամադրվել համայնքին։

Հետագայում, ՀՖՖ-ի հետ համագործակցության արդյունքում, համայնքն այդ թիվն ավելացրել է վարչական բոլոր տարածքներում, հարկ եղած դեպքում՝ Ռուբեն Հայրապետյանն անձամբ է ավելացրել խաղադաշտերի կառուցման գումարը: 

Ինչպես վերոգրյալ տեքստում նշեցինք, այս խաղադաշտերը, «թավշյա հեղափոխական» իշխանության անգործության հետևանքով անմխիթար վիճակում են հայտնվել՝ բասկետբոլի ջարդված զամբյուղներ, մաշված ու պատառոտված արհեստական գազոններ և, առհասարա՛կ, լքված ու ֆիզիկապես մաշված խաղահրապարակներ․․․

Հետո էլ կասեք՝ շնորհավոր երեխաների պաշտպանության օրը․․․

Արմինե Մկրտումյան