Պետք է ընդդիմությանը չխանգարել, որ մինչև քոք մաշեն. Փաշինյանը հիշեցրեց Քոչարյանի խոսքը

Իմ գնահատականներով իրավիճակն այլևս քաղաքական չէ,այլ լոգիստիկ, որովհետև մենք հիմա խոսում ենք քաղաքում խցանման, երթևեկության շարժի աստիճանի մասին։ Տեղի ունեցողը մի փոքր զիջում է Ծիծեռնակաբերդի խճուղու փլուզմանը, և այստեղ սիներգիա է առաջանում, և մենք տեսնում ենք խցանման ավելի բարձր աստիճան։ Այսօր Ազգային ժողովում հարցուպատասխանի ժամանակ ասաց Նիկոլ Փաշինյանը՝ անդրադառնալով ընդդիմության ակցիաներին։

Փաշինյանի խոսքով՝ այդ պրոցեսը սկսվել է քաղաքական շեշտադրումներով և Հայաստանի ընդդիմությունն ավելի քան մեկ ամիս հնարավորություն է ունեցել բոլոր քաղաքական միջոցներով, ակցիաներով իր ասելիքն ասել հանարությանը։ Եվ, սովորաբար, նման ակցիաների նպատակը լինում է հանրությանը պրոցեսի մեջ ներգրավելը և կոնկրետ քաղաքական պահանջի ձևավորումը։

«Բայց քանի որ հիմա ակնհայտ է, որ դա տեղի չի ունեցել, հիմա այդ գործընթացները ոչ թե իշխանության դեմ են, այլ հանրության։ Դրանք ունեն հետևյալ տրամաբանությունը, որ եթե դուք մեզ չմիացաք, ուրեմն՝ ավելի շատ մնացեք խցանումների մեջ, ուրեմն ավել շատ ձեզ համար կստեղծենք անհարմարություններ․․․ Ես նկատի ունեմ, որ այլևս քաղաքական նշանակությունը սպառված է և տեղի ունեցողի հիմնական իմաստը հանրության համար հնարավորինս անհարմարություն ստեղծելն է, թերևս լուծելով նաև 2021թ․ խորհրդարանական ընտրությունների համար։ Մենք գործ ունենք մի քաղաքական ուժի հետ, որը հետևողականորեն իրականացնում է իր առաջ քաշած քաղաքական կարգախոսը մի փոքր այլ տրամաբանությամբ։ Եթե հիշում եք այդ քաղաքական ուժը կարգախոս էր հրապարակել, որ իշխանությանը մինչև քոք մաշեցնելու է։ Դե հիմա, մենք տեսնում ենք, որ չկարողանալով դա իրականացնել՝ հիմա այդ ուժն ինքն իր նկատմամբ է իրականացնում այդ կարգախոսը։ Կարծում եմ, որ նրանց առանձնապես պետք չէ խանգարել, որ մինչև քոք մաշեն»,- ասաց Փաշինյանը։