Հենց այս պնդումը, հավատքն ու մոլուցքն է Քոչարյանի ձախողման հիմքը․․․

Ինչու՞ են ատում Քոչարյանին, բայց չեն ատում Սերժին։ Այս հարցադրմամբ ֆեյսբուքյան իր էջում գրառում է արել Մարինա Խաչատրյանը։ Նա մասնավորապես նշել է․

«Քոչարյանի կողմնակիցներն առաջ են տանում այն թեզը, թե նա է հաղթել Արցախյան պատերազմը։ Հենց այս պնդումը, հավատքն ու մոլուցքն է Քոչարյանի ձախողման հիմքը։

Եթե արդար լինենք ու դուրս գանք ծուռ հայելիների աշխարհից, ապա կտեսնենք, որ Արցախյան պատերազմը մեր հայրերի հաղթանակն է ... բոլորի` և՛ հրամանատարների, և՛ զինվորների, և՛ որդեկորույս մոր, և՛ հացը ժամանակին թխողի, և՛ վիրավոր զինվորին բուժողի, և՛ ռմբակոծության ժամանակ թաքստոցում թաքնվող երեխայի։

Ինչու՞ պետք է օրինակ ազատամարտիկ Հայկն այսօր ապրի աղքատության մեջ, եթե ազատագրել է Արցախը։ Ինչու՞ պետք է ազատամարտիկ Արմենը մահանար քաղցկեղից` բուժման գումար չունենալու պատճառով։ Ինչու՞ պետք է գեներալ Մանվելը պատասխան տար բոլորի փոխարեն և ոչ մի «զինակից» չկանգներ նրա կողքին։

Արցախի ազատագրումը Ռոբերտ Քոչարյանի մենաշնորհը չէ։ Այդտեղ իր դերն է ունեցել նաև օրինակ հայրս, ով մնաց մինչև վերջ ու մեզ` երեխաներիս տարավ ռմբակոծության տակ` զինվորին անօգնական չթողնելու համար։ Իրենց դերն են ունեցել նաև բրազիլացի բժիշկ Աբելը, ոտքը կորցրած ազատամարտիկ Վարդգեսը, տղային հողին հանձնած տիկին Սվետան ...

ԱԶԳԻ ՁԵՌՔԲԵՐՈՒՄՆ Է ԱՐՑԱԽԸ, և ազգը չի հանդուրժում, երբ անհատը յուրացնում է այդ ձեռքբերումը։

Ամենայն հարգանքով իմ հայրենիքի յուրաքանչյուր պաշտպանի նկատմամբ` արձանագրում եմ. մարդկանց մեջ ատելություն է գեներացրել ԲՈԼՈՐԻ ՁԵՌՔԲԵՐՈՒՄԸ ՄԵԿԻՆ ՎԵՐԱԳՐԵԼՈՒ վարվելակարգը։ Հատկապես եթե հաշվի առնենք, որ պատերազմի տառապանքի միջով անցնողները մնացին աղքատության մեջ, իսկ մի քանի անհատ հարստացան։

Հ.Գ. Նկարագրածս չեմ տեսել Սերժի պարագայում, թե չէ հաստատ չէի լռի։

Հ.Գ. Հարգիր ինձ, որ հարգեմ քեզ։

Հ.Գ. Կոմանդո՛ս ջան, Վազգե՛ն սպարապետ, մեր անմա՛հ տղերք, Աստված ձեր հոգին լուսավորի»: