Երեկ ստացած պարգևավճարն ակնհայտ դարձրեց ձեր՝ այսօրվա գործած քայլերը, հատ-հատ պատասխան եք տալու․ Սաղաթելյանը՝ ոստիկաններին

Ազգային ժողովի փոխնախագահ Իշխան Սաղաթելյանն ուղիղ եթերում հայտարարեց, որ այս պահին անհնազանդության ակցիաները շարունակվում են՝ մայրաքաղաքի տարբեր փողոցներում և հատվածներում։

«Ոստիկանությունն իրեն պահում է այլանդակ վատ և անհամաչափ ուժ կիրառում անգամ պատգամավորների նկատմամբ։ Արդեն կան հստակ փաստեր և տվյալներ։ ԱԺ պատգամավորներ Արծվիկ Մինասյանի, Վահե Հակոբյանի և մի շարք այլ պատգամավորների նկատմամբ ակնհայտ ուժ է կիրառվել։ Բացի այդ, կան մի քանի հարյուր բերման ենթարկվածներ, սակայն պայքարը ոչ մի կերպ կանգ չի առնելու։ Բաժիններում անգամ տեղ չկա մեր հայրենակիցներին տեղավորելու համար»,- նշեց Սաղաթելյանը և հավելեց, որ ամբողջ քաղաքով հնչում են մեքենաների ազդանշաներն ու «Նիկոլ դավաճան», «Առանց Նիկոլ Հայաստան» վանկարկումները։ 

Սաղաթելյանը, դիմելով ոստիկաններին, ասաց․ «Երեկ ստացած  պարգևավճարն ակնհայտ դարձրեց ձեր՝ այսօրվա գործած քայլերը։ Դուք դարձել եք Նիկոլի գործիքը։ Դուք հատ-հատ պատասխան եք տալու։ Ձեր չափն ու սահմանը կորցրել եք։ Դուք օրենքի և օրինականության հետ որևէ կապ և առնչություն չունեք։ Դուք ընդամենը մեկ խելագարի ապօրինի հրահանգներն ու որոշումները կատարող եք։ Նիկոլի երաշխիքները, որ ինչ ուզում եք, արեք՝ մեկ է պատասխան չեք տալու, ես ձեզ ասում եմ՝ պատասխան եք տալու»։

Հիշեցնենք, որ «Հայաստան» խմբակցության պատգամավոր Աննա Գրիգորյանը լրագրողների հետ զրույցում անդրադառնալով ոստիկանության կողմից բիրտ ուժի կիրառմանը՝ նշեց, որ այսօր աննախադեպ բիրտ ուժ է կիրառվել։