Ռամզան Կադիրովը դիմել է Էրդողանին՝ խնդրելով չնպաստել վիրավոր զինվորների տարհանմանը Ազովստալի տարածքից

Չեչնիայի ղեկավար Ռամզան Կադիրովը դիմել է Թուրքիայի նախագահ Էրդողանին՝ խնդրելով չնպաստել վիրավոր զինվորների տարհանմանը Ազովստալի տարածքից։ Կադիրովն իր կոչը հրապարակել է Telegram ալիքում։

Թուրքիայի նախագահի մամուլի քարտուղարը նախօրեին ասել է, որ երկիրը պատրաստ է նավ ուղարկել Ազովստալ գործարանի տարածքից խաղաղ բնակիչներին և Ազովի ներկայացուցիչներին տարհանելու համար։ Մասնավորապես, Անկարայի ծրագիրը նախատեսում է մարդկանց տեղափոխում Ազովստալից Բերդյանսկի նավահանգիստ ցամաքային ճանապարհով և հետագա տեղափոխում Ստամբուլ՝ թուրքական նավով։ Կալինի խոսքով՝ ինքը պլանը քննարկել է Ուկրաինայի նախագահ Վլադիմիր Զելենսկու հետ Կիևում կայացած հանդիպման ժամանակ։

Մեկնաբանելով դա՝ Կադիրովն ասել է, որ «Ազովի» գումարտակի անդամները հայտնի են «իսլամական մեծ արժեքները» վիրավորող և ընդհանրապես իսլամի կրոնը ծաղրող պարբերական հայտարարություններով։

«Ես դիմում եմ Թուրքիայի նախագահ Ռեջեբ Թայիփ Էրդողանին. ազովցիները մարդասպաններ և աթեիստներ են, որոնց այժմ ցանկանում են ձեզ ներկայացնել որպես ռուսական ագրեսիայի անմեղ զոհեր։ Թույլ մի տվեք, որ ձեզ խաբեն հանցագործները, ովքեր ցանկանում են ձեր օգնությամբ խուսափել դատավարությունից և արժանի պատժից»,- գրել է Կադիրովը։