ՀՀ բոլոր անցակետերում այսուհետ կգործի անձնագրի վավերականության ժամկետը երկարաձգելու ծառայություն

Մատուցվող հանրային ծառայությունների որակը բարձրացնելու, ինչպես նաև համակարգում կոռուպցիոն ռիսկերը նվազեցնելու նպատակով ՀՀ պետական սահմանի անցման բոլոր կետերում գործում է անձնագրում օտարերկյա պետությունում վավերականության նշում կատարելու (հասարակության մեջ ընդունված ՎԻԶԱ հասկացությունը) և անձնագրի վավերականության ժամկետը երկարաձգելու ծառայությունները: Ծառայությունը գործում է նաև հանգստյան և տոնական ոչ աշխատանքային օրերին, նույնիսկ գիշերային ժամերին:
Այսինքն, այն դեպքում, երբ լրացել է անձնագրի վավերականության կամ օտարերկյա պետությունում վավերականության ժեմկետները և ոչ աշխատանքային օրվա կամ ժամի պատճառով քաղաքացին չի կարող դիմել անձնագրային ծառայություն, սակայն ցանկանում է ճամփորդել, նշված գործողությունների համար կարող է դիմել սահմանային անցման կետի անձնագրային և վիզաների վարչության ծառայությանը: Այս մասին տեղեկանում ենք ՀՀ Ոստիկանության Անձնագրային և վիզաների վարչությունից:

Անհրաժեշտ է ընդունել ի գիտություն.

Հին նմուշի անձնագրի վավերականության ժամկետը կարող է երկարաձգվել միայն մեկ անգամ և ընդհանուր վավերականության ժամկետը չի կարող անցնել 15 տարուց:

Մինչև 16 տարեկան հասակում ստացած անձնագրերի վավերականության ժամկետը չի երկարաձգվում:

Անձնագրում օտարերկյա պետությունում վավերականության ժամկետի նշում կատարելու համար արական սեռի զինապարտ ՀՀ քաղաքացիները պետք է ներկայացնեն զինվորական գրքույկ (խոսքը վերաբերում է մինչև 35 տարեկան արական սեռի ՀՀ քաղաքացիներին):