Ուրսուլա ֆոն դեր Լյայենը մեկնում է Հունգարիա, որպեսզի համոզի Օրբանին աջակցել Ռուսաստանի դեմ պատժամիջոցներին

Եվրահանձնաժողովի նախագահ Ուրսուլա ֆոն դեր Լյայենը մեկնում է Հունգարիա, որպեսզի հանդիպի վարչապետ Վիկտոր Օրբանի հետ եւ համոզի նրան աջակցել ռուսական նավթի ներմուծումն արգելելու իր առաջարկին, գրում է Politico-ն։

«Նրանք կքննարկեն եվրոպական էներգետիկ անվտանգության հետ կապված հարցեր»,- ասել է ֆոն դեր Լյայենի ներկայացուցիչը։

Հունգարիան արգելափակել է Ռուսաստանի նավթարդյունաբերության դեմ համաեվրոպական պատժամիջոցների պլանները, որոնք ֆոն դեր Լյայենն առաջարկել էր մայիսի 4-ին:

ԵՄ 27 երկրների միջեւ բանակցությունները դադարեցվել են կիրակի օրը՝ առանց համաձայնության, եւ Բրյուսելում դիվանագետները դեռ չգիտեն, թե երբ նոր հանդիպում կհրավիրվի:

Եվրահանձնաժողովն առաջարկում է վեց ամսվա ընթացքում աստիճանաբար դադարեցնել ռուսական հում նավթի, իսկ մինչեւ այս տարվա վերջը՝ վերամշակված վառելիքի ներմուծումը։

Ըստ ծրագրի վերջին նախագծի՝ Հունգարիան եւ Սլովակիան, որոնք երկուսն էլ դեպի ծով ելք չունեն եւ մեծապես կախված են ռուսական նավթից, հետաձգում են ստացել մինչեւ 2024 թվականի վերջը: Չեխիան՝ մինչեւ 2024 թվականի հունիսի վերջը, մինչեւ նավթի էմբարգոյի ուժի մեջ մտնելը։

Սակայն զիջումները չեն բավարարլ Հունգարիային, հայտարարել են դիվանագետները կիրակնօրյա հանդիպումից հետո։ Օրբանն ասել է, որ ռուսական նավթի ներմուծման արգելափակման ազդեցությունը հունգարական տնտեսության վրա միջուկային ռումբի ազդեցության նման կլինի:

ԵՀ-ն եւ ԵՄ Խորհրդում Ֆրանսիայի նախագահությունը հայտարարել են՝  կշարունակեն աշխատել էներգետիկ անվտանգության երաշխիքների վրա։

Դիվանագետների համար պարզ չէ, թե երբ կառաջարկվի պատժամիջոցների նոր փաթեթի նախագիծը, կամ երբ իրենք հաջորդ անգամ կհանդիպեն՝ պլանը քննարկելու համար: