Սուր շնչառական վարակներով գրանցվել է հոսպիտալացման 515 դեպք, 126-ը` թոքաբորբ

ՀՀ առողջապահության նախարարությունում ստեղծված արագ և օպերատիվ արձանքման աշխատանքային խումբը ՀՀ առողջապահության նախարար Արմեն Մուրադյանի գլխավորությամբ երեկ հերթական խորհրդակցությունն է անցկացրել «Սուրբ Աստվածամայր» բժշկական կենտրոնում:

Նախարարության լրատվականից հայտնում են, որ հանգամանալից անդրադարձ է կատարվել հանրապետությունում առկա համաճարակային իրավիճակին:

Աշխատանքային խմբի անդամներն ըստ ոլորտների նախարարին ներկայացրել են կատարած աշխատանքների արդյունքները, ամփոփել են ամենօրյա կտրվածքով ստացված տվյալները:

Նախարարն այցելել է բժշկական կենտրոնի վերակենդանացման բաժանմունք, ծանոթացել բուժում ստացող երեխաների առողջական վիճակին: Ըստ նախարարության հաղորդագրության՝ այդ պահին բաժանմունքում բուժվում է 20 երեխա, որից միայն 10-ի մոտ է առկա սուր շնչառական վարակ:

Լրագրողների հետ զրույցում Արմեն Մուրադյանը նշել է, որ այս պահի դրությամբ սուր շնչառական վարակներով հանրապետությունում գրանցվել է հոսպիտալացման 515 դեպք, որից 126-ը` թոքաբորբ:

Նախարարի խոսքով` ոչ միայն Հայաստանում, այլև եվրոպական տարածաշրջանում է գրանցվում գրիպի ակտիվացում: Դեպքերի շուրջ 75 տոկոսը Ա տեսակի գրիպն, է որի գերակշռող մասը H1N1 ենթատեսակն է:

«Ժամանակին դիմելու և ինքնաբուժմամբ չզբավելու դեպքում հիվանդությունն ընթանում է որպես սովորական շնչառական վարակ»,- պարազաբանել է Արմեն Մուրադյանը:

Նրա տեղեկացմամբ` այս օրերին ծանրաբեռնված աշխատում է նաև շտապօգնության ծառայությունը, որը միայն Երևանում օրական կտրվածքով սպասարկում է շուրջ 900 կանչ: