Քաջարանի քաղաքապետ Մանվել Փարամազյանի խափանման միջոցի փոփոխության որոշումը կհրապարակվի մայիսի 2-ին

Մանվել Փարամազյանի մամուլի խոսնակ Դավիթ Համբարձումյանը հայտնում է՝ մայիսի 2-ին, ժամը 17։00-ին` ՀՀ Սյունիքի մարզի ընդհանուր իրավասության դատարանի Գորիսի նստավայրում, դատավոր Լուսինե Սեփխանյանի նախագահությամբ կհրապարակվի Քաջարանի քաղաքապետ Մանվել Փարամազյանի խափանման միջոցի փոփոխության որոշումը: 

«Հարգելի հայրենակիցներ` մայիսի 2-ին, ժամը 17։00-ին` ՀՀ Սյունիքի մարզի ընդհանուր իրավասության դատարանի Գորիսի նստավայրում, դատավոր Լուսինե Սեփխանյանի նախագահությամբ կհրապարակվի Մանվել Փարամազյանի խափանման միջոցի փոփոխության որոշումը` մի որոշում, որի արդարությանը անհամբեր սպասում է քաջարանցին և Փարամազյանին ճանաչող ցանկացած հայ մարդ։

Մանվել Փարամազյանի ազատությունը օրվա հրամայական է համայնքի և համայնքի բնակիչների համար, ովքեր անհամբեր սպասում են նրա վերադարձին։ Օրվա ընթացքում ստանում եմ բազմաթիվ հեռախոսազանգեր ու հաղորդագրություններ և դրսում մարդկանց հանդիպելուց առաջին հարցը դա է, թե ե՞րբ է վերադառնալու մեր համայնքի ղեկավարը։

Համայնքն հավատով սպասում է, որ մայիսյան առաջին երկուշաբթին կբերի արդարությամբ համեմված ավետիս` Քաջարան համայնքին և Սյունյաց աշխարհին։

Հավատով և անհամբեր սպասում ենք այդ ազատությանը»,- գրել է նա իր ֆեյսբուքյան էջում։

Հիշեցնենք, որ Մանվել Փարամազյանը մեղադրվում է հանցավոր ճանապարհով ձեռք բերված գույքը պարտակելու եղանակներով Արմեն Անդրեասյանին հափշտակելուն օժանդակելու մեջ։ Ըստ մեղադրանքի՝ ՀՀ Քաջարան համայնքի Լեռնագործների 18 հասցեում գրանցված մոլիբդենային, պղնձի եւ այլ գունավոր մետաղների արդյունահանմամբ ու հարստացմամբ զբաղվող «Զանգեզուրի պղնձամոլիբդենային կոմբինատ» ՓԲ ընկերության առանձնապես խոշոր չափերի՝ շուրջ 65, 403, 333 ՀՀ դրամ գույքը, Նվեր Մկրտչյանի եւ Քաջարանի համայնքապետարանի ֆինանսատնտեսագիտական, եկամուտների հաշվառման եւ հավաքագրման բաժնի պետ Վազգեն Ռուշանի Ազարյանի օժանդակությամբ ստացել է առանձնապես խոշոր չափերով կաշառք՝ իր լիազորությունների շրջանակում գործողություններ կատարելու, պաշտոնեական դիրքն օգտագործելով այդպիսի գործողությունների կատարմանը նպաստելու համար:

Բացի այդ, Մանվել Փարամազյանը, Քաջարանի համայնքապետարանի աշխատակազմի համայնքային կառավարման տեղեկատվական համակարգի կառավարող Ռոզա Ստեփանյանի, նույն համայնքի ղեկավարի տեղակալ Զոհրապ Առաքելյանի, ինչպես նաեւ Քաջարանի համայնքապետարանի՝ դեռեւս ինքնությունները չպարզված այլ աշխատակիցների օժանդակությամբ, շահադիտական դրդումներով պաշտոնեական փաստաթղթերում ակնհայտ կեղծ տեղեկություններ մտցնելու եղանակով եւ կեղծ փաստաթղթեր կազմելու միջոցով 2018-2019 թվականների ընթացքում կատարել է պաշտոնեական կեղծիքներ:

Դրանից բացի, Մանվել Փարամազյանը պաշտոնեական դիրքն օգտագործելով, Ռոզա Ստեփանյանի, Զոհրապ Տիգրանի Առաքելյանի, ինչպես նաեւ համայնքապետարանի՝ դեռեւս ինքնությունները չպարզված այլ աշխատակիցների օժանդակությամբ, կատարել է Քաջարան համայնքի՝ իրեն վստահված զգալի չափերով գումարի յուրացում: