Կարծում եմ՝ կեղծ օրակարգ է․ ի՞նչ է նշանակում՝ Արցախը հանձնել են, կամ զոհերն իրենց պատճառով են եղել․ Երևանի քաղաքապետ․ «Հրապարակ»

«Հրապարակ» թերթը գրում է․ «Երևանի քաղաքապետ Հրաչյա Սարգսյանից հետաքրքրվեցինք՝ հնարավո՞ր է տրանսպորտի ուղեվարձը թանկանա, դիզվառելիքը հասել է 650 դրամի։

«Մեր նոր բերած ավտոբուսները գազով են աշխատում, հին «Higer»-ներից 87-ը նույնպես գազով են աշխատում։ Դիզելով նոր Gazel Next-երն են եւ «Higer»-ների որոշ քանակ, ուստի այս պահի դրությամբ չենք քննարկում ուղեվարձի բարձրացման հարցը։ Օրինակ, աղբահանության վճարը, որի համար քաղաքացին վճարում է 200 դրամ։ Եթե 1 մլն 100 հազար քաղաքացի է, առավելագույն գանձվող գումարը կազմում է 2 մլրդ 200 մլն դրամ։ Իրավաբանական անձանցից էլ որ հավաքում ենք, փաստացի կարող է լինել պայմանական 3 մլրդ 500 մլն դրամ, մենք էս պահի դրությամբ ծախսում ենք 4 մլրդ 800 մլն։ Այսինքն՝ ստացվում է, որ աղբահանության համար մենք սուբսիդավորում ենք։ Հիմա նույնը տրանսպորտն է»։

- Այսինքն՝ սուբսիդավորո՞ւմ եք տրանսպորտի ուղեվարձը։

- Քաղաքապետարանը՝ չէ, համայնքի բոլոր բնակիչների միջոցներով էս պահի դրությամբ կարողանում ենք ապահովել։ Բայց երբ որ մենք միասնական տոմսային համակարգ ունենանք, այդ ժամանակ կարծում եմ՝ կքննարկվի այդ հարցը։

- 2013-ին ուղեվարձի թանկացման դեմ ակցիաներ էին, բայց այն ժամանակ այսքան թանկ չէր վառելիքը։ Ի՞նչ տեղի ունեցավ, որ այս խնդիրն այլեւս չբարձրացվեց։

- Ես կարծում եմ՝ խնդիրն այն էր, որ սկզբից թանկացնում էին, հետո առաջարկում էին ծառայությունները բարելավել։ Էս պահի դրությամբ մենք սակագնի մասին չենք խոսում, իսկ ծառայությունները բարելավում ենք։

- Իսկ կարո՞ղ է մտավախություն կա, որ եթե թանկացնեք, մարդիկ կհեղեղեն փողոցները, հիմա էլ ընդդիմությունն ակցիաներ է անում։

- Չէ, ես կարծում եմ՝ ոչ մի բան չի լինի։ Կարծում եմ՝ մեր համաքաղաքացիները բավականին բանիմաց են, եւ էդ բանիմացության շրջանակներում, կարծում եմ, եթե նույնիսկ քննարկվի ուղեվարձի թանկացման հարց, կքննարկվի միայն էն պարագայում, երբ որ մենք ծառայություններն ամբողջական տրամադրենք։

- Ի դեպ, հետեւո՞ւմ եք փողոցային ակցիաներին, ինչպե՞ս եք վերաբերվում, որ հաճախ քաղաքում երթեւեկությունը պարալիզացվում է։

- Իհարկե, նորմալ չեմ վերաբերվում դրան, ես կարծում եմ, որ մեր պետությունն էս պահի դրութամբ էն վիճակում չէ, որ էդ ակցիաների միջոցով պահանջում են գործող իշխանության հեռացումը։

- Իսկ 2018-ին նորմա՞լ էիք վերաբերվում, երբ ամբողջ քաղաքը պարալիզացվել էր։

- Այո։ Ես կարծում եմ՝ արժեհամակարգ է էս պահի դրությամբ փոխվել Հայաստանի Հանրապետությունում, եւ վիճակն ավելի լավացել է։ Եթե գործող ընդդիմությունը մտածում է, որ վերադառնալու է իշխանության, եւ լինելու է նույն հասարակությունը, ինչ մինչեւ 2018 թվականն էր, կարծում եմ՝ սխալվում է։

- Բայց գործող ընդդիմությունը չի ասում, որ գալիս է իշխանության, ասում է՝ սրանք Արցախը հանձնել են, զոհերի պատճառ են դարձել, հիմա էլ շարունակում են հանձնել։

- Ես կարծում եմ՝ դա կեղծ օրակարգ է։ Ի՞նչ է նշանակում՝ Արցախը հանձնել են, կամ զոհերն իրենց պատճառով են եղել։

- Բայց Փաշինյանն ինքն ասաց, որ կարող էր հանձնել Արցախը, իհարկե՝ առանց զոհերի։ Բավարա՞ր չէ մարդու մեղքն ընկալելու համար։

- Ես կարծում եմ՝ դա բավարար չէ, եւ դա կոնտեքստից կտրված եք Դուք ասում։ Ես վստահություն ունեմ, որ վարչապետի բոլոր նկրտումները բավականին ազնիվ են, եւ ինքը մտածում է Հայաստանի Հանրապետության մասին։

- Գուցե բավականին ազնիվ են, բայց ոչ՝ ամբողջությամբ։

- Ես․․․․ ես վստահ եմ, որ ազնիվ է․․․ չգիտեմ, մենք հիմա աշխարհաքաղաքական էն վիճակում չենք, էլի, որ սենց բաներ ենք իրականացնում, ես կարծում եմ՝ պետք է բոլորը՝ ե՛ւ ընդդիմությունը, ե՛ւ իշխանությունը, միասնական իրար հետ լուծումներ գտնենք։

- Դուք ոչ մի խնդիր չե՞ք տեսնում Արցախի ճակատագրի, մեր երկրի անվտանգային համակարգի մասով։

- Իհարկե, խնդիրներ կան, բայց էդ խնդիրները լուծելու համար պրակտիկ բաներ է պետք իրականացնել, պրակտիկ, ամենօրյա աշխատանք է պետք իրականացնել։ Երբ որ պատերազմը սկսվել էր, ու քաղաքում շչակներ չկային, որ կարողանայինք ազդարարման համակարգ միացնեինք, էդ շչակները էնպես չէր, որ մեր ժամանակով չէին դրել, գիշերով կիլոմետրերով կաբել էինք քաշում։ Ես գոնե քաղաքապետարանի ներսից տեսել եմ, թե ինչ ժառանգություն ենք մենք ստացել։ Իհարկե, նաեւ դրական բաներ էլ են եղել։

- Բայց պատերազմը շչակների պատճառով չենք պարտվել։

- Չէ, շչակը ես Ձեզ որպես օրինակ բերեցի։ Նույնը՝ բանակում՝ լիքը խնդիրներ ենք ունեցել․․․

- Նախկիններն են մեղավոր։

- Չեմ ասում՝ նախկինները, բոլորս ենք մեղավոր, ոչ միայն նախկինները, Դուք, ես՝ բոլորս մեղավոր ենք»։

Մանրամասները՝ թերթի այսօրվա համարում։