Էլ ո՞ ւր մնաց  «Ավելի Բարեկարգ Երևան»-ը. Համատարած աղբ ու ձնապատ փողոցներ

Երևանում ոչ միայն առատ ձյուն է տեղում, այլև տարբեր շրջաններում առատ աղբակույտեր են գոյանում:

Դեռ 2014թ-ից  լիբանանյան «Սանիթեք» ընկերությունը, Երևանի քաղաքապետարանի հետ կնքած պայմանագրի համաձայն, Արաբկիր, Ավան, Նոր Նորք, Էրեբունի, Նուբարաշեն և Քանաքեռ-Զեյթուն վարչական շրջաններում իրականացնում է  աղբահանության և սանմաքրման աշխատանքեր: Իսկ այս ձմեռ նաև ստանձնել է ձյան հեռացման աշխատանքները:

Դեռ տարեսկզբին երևանցիներն առիթ ունեցան ծանոթանալու  ընկերության կատարած «մաքրության» աշխատանքերին, ասել է թե մայթերն ու փողոցներն այդպես էլ չազատվեցին ձյան շերտից: Եթե իհարկե հաշվի չառնենք վերջին 2 օրը, որի ընթացքում, ջերմության բարձրացման հետ մեկտեղ, ակտիվորեն ձյան հալոցքներ սկսեցին և ճանապարհներին տեղ-տեղ ասֆալտը բացվեց: Հավանաբար  ընկերությունն էլ իր հույսը եղանակի տաքացման հետ էր կապել:

Հատկանշական է, որ միայն «Սանիթեք»-ի և քաղաքապետարանի աշխատակիցներն էին «տեսնում» մաքրությունն ու ձյան մաքրման աշխատաքների  հետ կապված ամպագոռգոռ հայտարարություններ անում: Մինչդեռ քաղաքացիները շարունակում են մայթերին սայթաքել ու ընկնել, իսկ ավտոնմեքենաներն էլ` վթարի ենթարկվել` սառած փողոցների պատճառով: Մի խոսքով երթևեկույթունը կաթվածահար է եղել:

Նույն պատկերն է նաև աղբահանության դեպքում. «Սանիթեք» ընկերությունն իբր աղբահանություն է իրականցնում, քաղաքապետարանն էլ իբր վերահսկում ու արձանագրում է:

Բայց միայն աշխատանքերի մասին բարձր խոսելով` մարդկանց չես համոզի, որ իրոք դրանք իրականցվում են:

Նկարում (ստորև) պատկերված է Քանաքեռ-Զեյթուն վարչական շրջանի մի հատված միայն: Սակայն տեղի բնակիչ լինելով` վստահեցնում եմ, որ նույն պատկերնն է նաև մյուս փողոցներում: Համատարած աղբ, ձնապատ փողոցներ ու սառած մայթեր, որտեղով քայլելը տհաճ է, անցանկալի և հղի վտանգներով:

Այս իրավիճակում արդեն ոչ մի արդարացում չկա. Եթե «Սանիթեք»-ը պատճառաբանի, թե փողոցները սառած են և չի կարողացել աղբը հեռացնել` մեղավորը դարձյալ ինքն է, քանի որ ձյուն մաքրողը` նույն ինքը աղբահանություն իրականացողն է:

Իսկ ինչ մնում է քաղաքապետարանին, ապա եթե վերջինս կարծում է, որ ձեռքերը լվացել է այս կեղտոտ գործից ու մի կողմ քաշվել` իրեն վերապահելով միայն վերահսկողի դերը, ապա հարկ է նկատել, որ վերահսկողի պատասխանատվությունն ավելի մեծ է. հատկապես, եթե խոսքը վերաբերում է իր քաղաքի սանիտարական վիճակին  ու իր քաղաքացիների անվտանգությանը:

Էլ ո՞ ւր մնաց «Ավելի Բարեկարգ Երևան»-ը…