Մենք բոլորս գիտակցում ենք, որ օր առաջ պետք է ազատվենք այս իշխանութունից․ Զոհրաբյանը զոհվածների ծնողների հետ Դատախազություն ներկայացրեց իրենց պահանջները

Ինչպես տեղեկացրել էինք, 44-օրյա պատերազմում զոհված տղաների ծնողներն այսօր ակցիա են իրականացնում։ Նրանք Շառլ Ազնավուրի հրապարակից երթով շարժվեցին դեպի Գլխավոր դատախազության շենք։ Շենքի մոտ մեծ թվով ոստիկանական ուժեր են կենտրոնացված։ 

Դատախազության դիմաց են նաև ԱԺ «Պատիվ ունեմ» դաշինքի ղեկավար Արթուր Վանեցյանը, «Հայաստան» դաշինքի անդամները, Փաստաբանների պալատի նախկին ղեկավար, Ազատագրական շարժման ղեկավար Արա Զոհրաբյանը:

«Հասկանում եմ, որ բոլորս այստեղ լավ առիթով չենք հավաքվել։ Ուզում եմ ձեզ տեղեկացնել, որ դեռևս 2020թ․-ի դեկտեմբերի 22-ին ավելի քան 430 փաստաբան հանցագործության մասին հաղորդում է ներկայացրել Գլխավոր դատախազին՝ Քրեական օրենսգրքի 299 հոդվածի հատկանիշներով քրեական գործ հարուցելու համար։ Սա Պետական դավաճանության մասին հոդվածն է։ Գլխավոր դատախազությունն այդ հաղորդումն ուղղորդել էր Հատուկ քննչական ծառայություն, իսկ վերջինս գրություն էր ուղարկել։ Հետո սկսվեց մեր քաշքշուկը։ Մենք դիմեցինք Դատախազություն, դատարան․․․»,- նշեց Զոհրաբյանը։

Նա հիշեցրեց, որ 2022թ․-ի փետրվարի 24-ից առ այսօր (արդեն 2 ամիսը լրացել է) մենք չունենք Զինված ուժերի Գլխավոր շտաբի պետ, և սա այն դեպքում, երբ բոլորս տեսնում ենք, որ ռազմական գործողությունների վտանգը շատ մեծ է։ 

«Այս պայմաններում մենք առաջարկում ենք Գլխավոր դատախազին ուժ գտնել իր մեջ և իրավական լուծում տալ այս խնդրին։ Որովհետև, երբ իրավական լուծում չի գտնում, այլևս համբերել հնարավոր չէ։ Մենք բոլորս գիտակցում ենք, որ օր առաջ պետք է ազատվենք այս իշխանութունից։ Մենք պահանջում ենք թիվ 61209421 քրեական գործով որոշում կայացնել ՀՀ ՔՕ 299 հոդվաի 1-ին մասով, 300 հոդվածի 2-րդ մասով, և 300 հոդվածի 3-րդ մասով Նիկոլ Փաշինյանին որպես մեղադրյալ ներգրավելու մասին»,- ասաց Զոհրաբյանը և հավելեց, որ եթե որևէ մեկը կցանկանա միանալ այս պահանջին, ապա կարող են մոտենալ և ստորագրել։