Պատերազմը կործանարար է, երբ երկրի ղեկին անկարողությունը խաղաղասիրության տակ թաքցնող մեկն է․ Թորոսյանի «աղմուկ-աղաղակով» յուրայինների ուղեղները լվացեք

ԱԺ ՔՊ-ական պատգամավոր Արսեն Թորոսյանը ֆեյսբուքյան իր էջում մի գրառում է արել, որով փորձել է ցեխ շպրտել հայրենիքի պաշտպանության համար մեկնարկած շարժման կազմակերպիչների վրա:

Թորոսյանը ֆեյսբուքյան իր էջում գրել է, թե իբր իրենք երկիրը տանում են խաղաղության, իսկ «ընդդիմությունն ուզում է նոր պատերազմ՝ նոր զոհերով և պարտությունով»...

Այս գրառումն, իհարկե, մեկ բառով թերևս կարելի էր որակել «ցինիկ գրառում», անտեսել այն և անցնել առաջ: 

Սակայն մեկ-երկու դիտարկում: 

Թորոսյանն ասում է, թե՝ ««խաղաղություն» գաղափարի դեմոնիզացիան ոչ այլ ինչ է, քան պատերազմի քարոզ»...

Հարկ է նկատել, որ այդ ոչ թե ընդդիմությունն է «դեմոնիզացնում» խաղաղության գաղափարը, այլ իշխանությունն է խաղաղության գաղափարի տակ մարդկանց լղոզված հրամցնում թշնամի երկրի առաջ քաշված թեզերն ու պահանջները՝ ոտնահարելով հայի արժանապատվությունը և տապալելով հայի ազգի ինքնասիրությունը...

Հարկ է նաև հասկանալ, թե այդ ո՞ր խաղաղության մասին է խոսքը... ա՞յն խաղաղության, որ իշխանությունը մուրում է, իսկ թուրքը շարունակում ոչ միայն արհամարհել, այլև սպառնալից կոչերով ասել, թե՝ «Էրիվան» են հասնելու...

Հարկ է նկատել, որ հենց Ցեղասպանության օրը, երբ հազարավոր հայեր, աշխարհի բոլոր կողմերում, ակցիաներով ու ջահերով երթերով ցույց էին տալիս, որ իրենք պահանջատեր են՝ Թուրքիայի արտգործնախարար Չավուշօղլուն «գորշ գայլերի» հայտնի ժեստով ու ցինիկ ժպիտով ցույց տվեց, որ Թուրքիան թքած ունի հայերի վրա էլ, նրա պահանջների վրա էլ․․․

Հարկ է նկատել, որ Թուրքիան ու Ադրբեջանը երբեք չեն դադարել հայատյաց քաղաքականությունն ու նրանց խաղաղությունը պետք է առանց հայերի (եթե դեռ չեք հասկացել)․․․

Կարելի է թվարկել հարյուր ու ավելի փաստ, որ եթե պայքար չլինի այս իշխանությունների որդեգրած  «խաղաղության դարաշրջանի» դեմ, ապա հետևանքները կլինեն ավելի աղետալի, քան կան․․․

Մի հարցում միայն համաձայն կարող ենք լինել՝ այն, որ պատերազմը կործանարար է․․․ այո՛, պատերազմը կործանարար է, երբ երկրի ղեկին անկարող և իրենց անկարողությունը խաղաղասիրության տակ թաքցնող մարդիկ են․․․ ի վերջո, հենց այս իշխանության օրոք եղավ պատերազմ, զոհվեցին հազարավոր քաջորդիներ ու թշնամուն սկուտեղի վրա հանձնվեցին հայկական տարածքներ: Եվ ի գիտություն Արսեն Թորոսյանի, այդ ժամանակ Երևանում և ընդհանրապես, ամենևին էլ բողոքի ակցիաներ չէին: 

Դա խաղաղություն չէ, այլ թուրքի ստորացուցիչ սպառնալիքների տակ նվաստ գոյատևելու խաբկանք (եթե իհարկե կգոյատևենք)․․․

Սրան շարունակություն չտալու համար է, որ մարդիկ դուրս են գալիս պայքարի․․․

Իսկ իշխանության այս ու այն ներկայացուցիչների, այդ թվում նաև Թորոսյանի մանիպուլյացիոն հայտարարությունները պարզապես «աղմուկ-աղաղակ են»՝ աթոռը չկորցնելու և իշխանությունը մի քիչ էլ պահելու համար․․․

Այնպես որ, այդ հայտարարություններով միայն ձեր յուրայինների ուղեղները կարող եք լվանալ․․․

Արմինե Մկրտումյան