Ցանկացած հասարակության շարժիչ ուժը երիտասարդությունն է․ Տաթևը Մոսկվայից եկել է Ազատության հրապարակում ընթացող պայքարին միանալու համար

Ազատության հրապարակում այս պահին ստորագրահավաք է ընթանում։ Քաղաքացիներն այդպիսով միանում են  պայքարին և սատարում հացադուլ իրականացնող տղաներին։ Ստորագրահավաքին մասնակցողներից մեկը՝ Տաթևը, Մոսկվայից է եկել։ Վերջինս լրագրողների հետ զրույցում ասաց, որ եկել է ակցիաներին մասնակցելու։ 

«Ցանկացած հասարակության շարժիչ ուժը երիտասարդությունն է։ Առանց երիտասարդության հնարավոր չէ պատկերացնել որևէ շարժում և ընդհանուր առմամբ սա այն հարցն է, որ պետք է համազգային բնույթ կրի։ Եվ երիտասարդները պետք է իրենց խոսքն ասեն»,-ասաց Տաթևը։

Խոսելով Մոսկվայի հայ երիտասարդների և վերջիններիս պայքարի մասին, նշեց, որ հայ երիտասարդությունը Մոսկվայում շատ բազմաշերտ է և նրանց մեծ մասի պատկերացումը աղոտ է՝ թե՛ Արցախյան պայքարի, թե՛ ներկա քաղաքական իրադրության մասին։

«Դժվար են պատկերացնում, թե ինչ է արժեցել Արցախի ազատագրումը, այսքան տարի Արցախը պահելը, և, բնականաբար, հույզերը, էմոցիաները և դատողությունները չեն կարող միանանշանակ լինել։ Բայց համապատասխան աշխատանքների դեպքում, կսկսեն սատարել։ Բայց ովքեր տեղյակ են սատարում են այս պայքարին և դատապարտում քաղաքականությունը, որը վարում են հայաստանյան ներկա իշխանությունները»,-ասաց Տաթևը։