Ռուսաստանի կառավարությունն անելու է անհրաժեշտ ամեն ինչ Հայաստանի հետ երկկողմ համագործակցությունն ամրապնդելու համար․ Միշուստին

Ռուսաստանի կառավարությունն անելու է անհրաժեշտ ամեն ինչ Հայաստանի հետ երկկողմ համագործակցությունն ամրապնդելու համար, որի շուրջ երեքշաբթի օրը երկու երկրների ղեկավարների բանակցությունների ընթացքում ձեռք են բերվել պայմանավորվածություններ։ Այս մասին հայտարարել է ՌԴ կառավարության ղեկավար Միխայիլ Միշուստինը Հայաստանի վարչապետ Նիկոլ Փաշինյանի հետ չորեքշաբթի օրը կայացած հանդիպմանը։

«Նախագահ Վլադիմիր Վլադիմիրովիչ Պուտինի հետ երեկ կայացած բանակցություններում Դուք լայնածավալ պայմանավորվածություններ ձեռք բերեցիք երկկողմ համագործակցության ամրապնդման վերաբերյալ գրեթե բոլոր ոլորտներում, որոնք մեր երկրների օրակարգում են։ Ռուսաստանի կառավարությունը կձեռնարկի բոլոր անհրաժեշտ միջոցները՝ ընդունված որոշումները կյանքի կոչելու համար ամենաբարձր մակարդակով»,- վստահեցրել է Միշուստինը։

Նա շնորհակալություն է հայտնել Փաշինյանին Ռուսաստան կատարած այցի համար՝ նշելով, որ այն մեծ նշանակություն ունի Մոսկվային և Երևանին կապող բարեկամական և դաշնակցային հարաբերությունների հետագա զարգացման համար։

ՌԴ վարչապետը հիշեցրել է, որ 2022 թվականին պետությունները նշում են դիվանագիտական ​​հարաբերությունների հաստատման 30-ամյակը և Բարեկամության, համագործակցության և փոխօգնության պայմանագրի 25-ամյակը։