Ժամանակավոր կառավարությունը նախկին նախագահներից ոչ մեկը չի ղեկավարի․ Չալաբյան

«5165» շարժման անդամ Ավետիք Չալաբյանն Ազատության հրապարակում հրավիրած ասուլիսում հայտնեց, թե ինչ տարբերակով է հնարավոր հեռացնել Նիկոլ Փաշինյանին և ձևավորել ժամանակավոր կառավարություն։

Նա նկատեց, որ ժամանակավոր կառավարությունը պետք է ավելի վստահելի լինի, քան նախորդ կառավարությունը։ 

«Նախ՝ ժամանակավոր կառավարությունը չպետք է ղեկավարի նախկին նախագահներից ոչ մեկը, որպեսզի կարծիք չլինի, թե այս շարժումը ձևավորվել է նրանց հետ բերելու համար։ Եթե նրանք ուզում են ղեկավարել, թող մասնակցեն ընտրությունների, ստանան իրենց քվեն ու ղեկավարեն։ Ժամանակավոր կառավարությունը նրանց համար չի կարող լինել, այն պետք է ղեկավարեն երիտասարդ կադրեր»,- ասաց Չալաբյանը։

Նա նշեց, որ ժամանակավոր կառավարությունը, ըստ իրենց, պետք է տևի 1-1,5 տարի և այդ տարիների ընթացքում պետք է լուծի մի շարք խնդիրներ, որոնցից առաջինը բանակի ամրապնդումն է։

«Բանակը պետք է ունենա ղեկավարություն, որը կարող է հասկանալ, թե ինչ է պետք բանակի ամրացման, արդիականացման համար։ Նույնը պետք է կատարվի Արցախում, քանի որ այնտեղ մեր բանակը քայքայվել է»,- ասաց Չալաբյանը։

Հաջորդ կետով Չալաբյանը մատնանշում է ռազմաարդյունաբերության աջակցումը։

Այդպես նա կարևորեց նաև երկրի անվտանգությունը, որպեսզի հնարավոր լինի կանխել թշնամու առաջախաղացումը։ Չալաբյանը կարևորում է նաև ատելության մթնոլորտի վերացումը՝ հայաստանցի-ղարաբաղցի, սև-սպիտակ տարանջատումները վերացնելը։