ԱԱԾ-ին առաջարկում ենք հարգալից վերաբերմունք ցուցաբերել Արթուր Վանեցյանի նկատմամբ․ ԱԱԾ պահեստազորի սպաների միություն

Մեր հայրենիքի շուրջ տեղի ունեցող ծանր իրադարձությունների և դրանց դիմակայելու ուղղությամբ իշխանությունների դրսևորած պասիվ, նույնիսկ հանդուրժող վարքագծի դեմ իր և հանրության բողոքն արտահայտելու նպատակով Ազատության հրապարակում քաղաքական ակցիա է սկսել ու իրականացնում ԱԱԾ նախկին տնօրեն, գեներալ-մայոր Արթուր Վանեցյանը: Այս մասին հայտարարություն է տարածել «ԱԱԾ պահեստազորի սպաների միությունը»:

Հայտարարությունում նաեւ ասվում է. «Երեկ ականատեսը եղանք, թե ոստիկանության աշխատակիցներն ինչպես են առանց որևէ առիթի ու անհրաժեշտության ճնշում և ուժ գործադրում բողոքի ակցիայի մասնակիցների, այդ թվում և Ա. Վանեցյանի նկատմամբ:

Հասկանալի է, որ ոստիկանության և ուժային մյուս կառույցների գործողություններն ըստ էության ղեկավարվում, ուղղորդվում են անձամբ վարչապետի կողմից: Նա է ոստիկանապետ Վահե Ղազարյանին, նրա տեղակալ, ոլորտը համակարգող Կամո Ցուցուլյանին հանձնարարականներ տալիս, թե հավաքի մասնակիցներից ու լիդերներից յուրաքանչյուրի նկատմամբ ինչ կոշտությամբ գործեն: Վերջիններս էլ այդ հանձնարարականները կատարման նպատակով իջեցնում են իրենց ենթականերին:

Պարոնայք Վ. Ղազարյան և Կ. Ցուցուլյան, ոչինչ հավերժ չէ, այդ թվում և իշխանությունը: Օրինաչափորեն գալու է ժամանակը, երբ գնահատականի են արժանանալու յուրաքանչյուր պաշտոնյայի այսօրվա գործողությունները: Ուստի, անձամբ ճանաչելով Ձեզ, մանրամասնորեն տեղեկացված լինելով ձեր անցած ծառայողական ուղուց, մարդկային որակներից, ինչպես նաև սովորություններից` կոչ ենք անում զսպվածության:

Պահանջում ենք հարգել իշխանությունների կողմից իբր ժողովրդավարության բաստիոն հռչակված երկրում ազատ ակցիաներ անցկացնելու քաղաքացիների իրավունքը, առանձնակի հարգալից և կոռեկտ վերաբերմունք դրսևորել մեր գործընկերոջ, ԱԱԾ նախկին տնօրեն Արթուր Վանեցյանի անձի նկատմամբ` հաշվի առնելով, որ նա իրավապահ և կառավարման համակարգում ի պաշտոնե զբաղեցրել է պատասխանատու և ազդեցիկ դիրք: Վստահաբար կարող ենք փաստել, որ ոստիկանության մեր գործընկերների հետ մշտապես հարաբերվել ենք փոխադարձ հարգանքի, փոխօգնության մթնոլորտում և դրա արդյունքում արձանագրել դրական լրջագույն ձեռքբերումներ: Միմյանց նկատմամբ հարգանքն այսօր էլ պետք է պահպանել:

Դիմելով ԱԱԾ գործող ղեկավարությանն ու աշխատակիցներին` առաջարկում ենք գործել մեր համակարգին բնորոշ սառնասրտությամբ, սթափությամբ, օբյեկտիվ և աչալրջորեն հետևել ներքաղաքական զարգացումներին, պահանջել ընդգծված հարգալից վերաբերմունք ցուցաբերել ծառայության նախկին ղեկավար Արթուր Վանեցյանի նկատմամբ: Նույնիսկ Նիկոլ Փաշինյանն է բոլորիս ներկայությամբ անձամբ հայտարարել, որ ընդդիմության, այդ թվում իր նկատմամբ տարված աշխատանքներում ԱԱԾ-ն երբեք չի հատել կարմիր գծերը: Հետևաբար այսօր էլ ձեզանից պահանջվում է պահպանել այդ գործելաոճը, և որևէ մեկն իրավասու չէ Ձեզ դրդել դեմ գնալու համակարգի ներսում տասնամյակների ընթացքում ձևավորված դրական ավանդույթներին:

Թե ոստիկանության, թե ուժային մյուս կառույցների ղեկավարները պետք է գիտակցեն, որ իրենց մերժելի վարքագծով վատ օրինակ են ծառայում երիտասարդ աշխատակիցների համար և ապագայում նույն վերաբերմունքին կարող են իրենք արժանանալ: Ակնհայտ է, որ վերը նշած դեպքերը երիտասարդների մոտ խիստ նվազեցնում են համակարգում ծառայության անցնելու մոտիվացիան, խաթարում են սպայի պատիվը: