Քաղաքապետարանն ամեն օր ուժեղացված ստուգայցեր է անում բացօթյա ապօրինի առևտուրը Երևանում վերացնելու համար

Բացօթյա ապօրինի առևտուրը Երևանում վերացնելու համար քաղաքապետարանն ամեն օր ուժեղացված ստուգայցեր է անում՝ հիմա արդեն ոստիկանության աշխատակիցների հետ, հայտարարել է Երևանի քաղաքապետարանը։

Քաղաքապետարանի հաղորդագրության համաձայն՝ օրինախախտումն արձանագրելու համար պարեկների կողմից անձը տեղում նույնականացվում է, տվյալները ճշտվում ու փոխանցվում են:

 2021 թվականին առևտրի ոլորտում կազմվել է շուրջ 2200 արձանագրություն, իսկ 2022-ի առաջին եռամսյակում՝ 500:

Քաղաքապետարանի հաղորդագրության համաձայն՝ ով և որտեղ ցանկանա սննդամթերք վաճառել՝ չի կարող: Ըստ Առևտրի և ծառայությունների մասին օրենքի՝ բացօթյա առևտրով կարելի է զբաղվել միայն հատուկ թույլտվությամբ ու կոնկրետ ապրանքների դեպքում՝ ծաղիկ, ըմպելիք, պաղպաղակ:

Երևանի քաղաքապետարանը բացօթյա առևտուր իրականացնողներին առաջարկում է տեղափոխվել քաղաքի շուկաներ, որտեղ 1քմ-ի համար գինը մեկնարկում է 300-500 դրամից: Առևտրականների հետ քննարկվում է նաև նոր շուկաներ բացելու խնդիրը՝ պայմանով, որ մայթերին այլևս փողոցային առևտուր չլինի: