Համարձակության համար շնորհակալություն եմ ուզում հայտնել պետական-քաղաքական գործիչ Նիկոլ Փաշինյանին. Խաչատուր Սուքիասյան

«Այն հարևանները, որոնց հետ չենք ունեցել առևտրաշրջանառություն, ոչ մի հարաբերություն, պետք է ամեն ինչ անենք, որպեսզի, դրանք իրականություն դառնան»։ Այս մասին ԱԺ ամբիոնից իր ելույթի ժամանակ ասաց ՔՊ-ական պատգամավոր Խաչատուր Սուքիասյանը:

Նա նշեց, որ ամեն ինչ անելու են, որպեսզի խաղաղության օրակարգն իր տրամաբանական ավարտին հասցնեն:

«Ուզում եմ համարձակության համար շնորհակալություն հայտնել պետական, քաղաքական գործիչ Նիկոլ Փաշինյանին, որ ասաց այն ճշմարտությունը, որը մենք ունեցել ենք»,-հայտարարեց Խաչատուր Սուքիասյանը։

Նա հարց ուղղեց ՀՀ երկրորդ նախագահ Ռոբերտ Քոչարյանին ու ՀՀ երրորդ նախագահ Սերժ Սարգսյանին, թե ինչո՞ւ Ղարաբաղի խնդիրը չլուծեցին:

«Լավ, դուք եղել եք պաշտպանության նախարար, ինչո՞ւ չգրավեցիք ամբողջ տարածաշրջանը, որ այսօր հանգիստ մնային, սա անընդունելի է ու ես, երբ նշեցի, որ պետք է համարձակություն ունենալ ու հասարակությանն ասել դառը ճշմարտությունը, դա նրա համար է, որ երբ դու ճշմարտությունը հասարակությանը ասում ես, հասարակությունը գտնում է, գիտակցում է ու սկսում է պաշտպանել տվյալ իշխանությանը», - ասաց Սուքիասյանը։