Ուկրաինային սպառազինություն տրամադրելու հնարավորություն Հարավային Կորեան չի դիտարկում

 Ինչպես հայտնում է «Ռիա Նովոստի»-ն, Հարավային Կորեայի ԱԳՆ-ի կողմից լիազորված անձը լրագրողների հետ զրույցի ժամանակ  հայտարարությամբ է հանդես եկել  այն մասին, որ Հարավային Կորեան, չնայած Կիևից հնչած խնդրանքին, չի դիտարկում Ուկրաինային սպառազինություն տրամադրելու հնարավորությունը:

Ապրիլի 11-ին Ուկրաինայի նախագահ Վլադիմիր Զելենսկին էր հեռավար ձևաչափով դիմել Հարավային Կորեայի Հանրապետության խորհրդարանի պատգամավորներին՝ խնդրելով ռազմական օգնություն ու զինտեխնիկա տրամադրել իրենց։

Հարավային Կորեան արդեն իսկ կայացրել է Ուկրաինային հավելյալ 30 միլիոն դոլարի հումանիտար օգնություն հատկացնելու որոշում, իսկ երկրի պաշտպանության նախարարությունը մտադիր է հաջորդ շաբաթվանից Կիևին 1,6 միլիոն դոլարի ռազմամթերք, այդ թվում՝ զրահաբաճկոններ, սաղավարտներ, դեղորայք տրամադրել, բայց ոչ զենք ու սպառազինություն՝ փուլային տարբերակով,

«Մենք Ուկրաինային աջակցում ենք այսպիսի միջոցներով՝ բացառելով զենքի մատակարարումը։ Մենք նաև լրացուցիչ օգնության ծրագիրն ենք խթանում։ Այս փուլում բանակցություններ են ընթանում լրացուցիչ ռազմամթերք հատկացնելու հարցի շուրջ, բայց սպառազինության տրամադրում այս շրջանակում չի դիտարկվում։ Այսպիսի դիրքորոշում է հայտնել նաև մեր երկրի պաշտպանության նախարարությունը»,- հայտարարել է Հարավային Կորեայի ԱԳՆ ներկայացուցիչը։