Արցախ գնալն իշխանությունը դիտարկում է սադրանք, սա խելագարություն է, աբսուրդ․ Արամ Վարդևանյանն Արցախի ճանապարհին է (տեսանյութ)

«Ես նկատեցի, որ չափազանց բուռն, ակտիվ և, ինչ-որ իմաստով, ոչ սթափ արձագանքներ հնչեցին ընդդիմության ներկայացրած գործողությունների վերաբերյալ»: Այս մասին ֆեյսբուքյան տեսաուղերձով ասաց «Հայաստան» խմբակցության պատգամավոր Արամ Վարդևանյանը՝ Արցախ գնալու ճանապարհից արձագանքելով խորհրդարանական մեծամասնության հայտարարություններին, որոնք առնչվում էին ընդդիմության՝ Արցախ մեկնելուն և Արցախի դրոշն ԱԺ ամբիոնին փակցնելուն։

Արամ Վարդևանյանը նկատեց, որ ՔՊ-ականների համար Արցախ գնալն իրենից սադրանք է ներկայացնում։

«Կներեք, ես ճի՞շտ եմ հասկանում, որ այդ ընկալումը կամ մեկնաբանումը պայմանավորված է Ադրբեջանի վարքագծով, կամ թուրք-ադրբեջանական տանդեմով: Ես էլ այդ հարցադրումը շարունակեմ: Իսկ հնարավո՞ր է հետագայում «յան» ազգանունը բարձրաձայնելն էլ սադրանք դիտարկվի: Հնարավո՞ր է, որ, օրինակ, Լեոնիդ Ազգալդյանի, Բեկորի, սպարապետ Վազգեն Սարգսյանի անունը տալը հետագայում ևս սադրանք դիտարկվի»,- ասաց պատգամավորը։

Նա նշեց, որ երևույթը նորմալ չէ, աբսուրդի է հասնում և չի կարելի նման հոգեվիճակի մեջ մտնել՝ շեշտելով, որ Հայաստանը եղել է, կա ու կմնա Արցախի անվտանգության երաշխավորը:

«Ինչպե՞ս է ստացվում, որ Հայաստանի նորագույն պատմության մեջ Արցախ գնալն իշխանական դիրքերից հանդես եկողների համար վայնասունի առարկա և սադրանք է որակվում: Սա խելագարություն է, աբսուրդների աբսուրդը»,- ասաց ընդդիմադիր պատգամավորը և հայտնեց, որ նման հոգեվիճակը տեղ չունի հայկական իրականության մեջ։

Նա նկատեց, նաև, որ երբ ասում են, որ Հայաստանը չպետք է լինի կզած, հենց այս իրավիճակների համար են ասում:

«Ի՞նչ է նշանակում՝ Արցախ չգնալ, դրանով ի՞նչ հորդոր են տալիս այս իշխանությունները մեր հայրենակիցներին»,- նշեց Արամ Վարդևանյանը։

Նա կոչ արեց հայ ժողովրդին հաճախ գնալ Արցախ, քանի որ այնտեղ ունեն իրենց կարիքը և տարակուսեց, որ ներկայիս Հայաստանում խոսում է նման հարցերի վերաբերյալ:

«Այս վարքագիծը հայի տեսակի հետ առնչություն չունի: Հաղթանակած հայը, պատմության ընթացքում բազմաթիվ ավելի բարդ իրավիճակներ հաղթահարած հայ ազգը չպետք է լինի այս վիճակում, որ Արցախ գնալը դիտարկվի սադրանք»,- հայտարարեց Վարդևանյանը:

Նա ցավ հայտնեց, որ ԱԺ ամբիոնում տեղադրվում է Արցախի դրոշը, որի համար հազարավոր հերոսներ իրենց կյանք են տվել և ԱԺ պատգամավորի կարգավիճակ ունեցողն այն «ջարդում է» ամբիոնից։

«Արցախի դրոշի տեղադրումն ունի խորհուրդ՝ այն մեր միասնականությունն է, Արցախ-Հայաստան միասնականությունն է, որ պաշտպանելով Արցախը, պաշտպանում ենք Հայաստանը, որովհետև տեսանք, որ Արցախի դեմ ցանկացած սպառնալիքի դեպքում Հայաստանի սահմաններն էլ դրա հետ կապված են լինում»,- հայտարարեց ընդդիմադիր պատգամավորը: