Ինձ չեն կարող լռեցնել՝ ուզում են մսաղաց կապել, ուզում են՝ ջազվե, ուզում են՝ լվացքի մեքենա․ Շիրինյան (տեսանյութ)

Բաժնի պետի օպերատիվ գծով տեղակալն այնքան անկեղծ է, որ ասել է` կարդացի ու չզգացի, որ հանցագործության տարրեր կան։ Հետո նրան ասել են՝ այ տղա, պետք է ասես, որ հանցագործության տարրեր կան, ու նա ստիպված հակասական ցուցմունքներ է տվել։

Այս մասին լրագրողների հետ զրույցում ասաց ՀՀ ոստիկանության նախկին բարձրաստիճան սպա Սայաթ Շիրինյանը։

Նա նկատում է, որ այս իշխանությունները փորձ են անում լռեցնել իրեն։

«Իրենց շատ է անհանգստացնում «արնահեղություն» բառը, բայց բովանդակությունը չեն կարողանում հասկանալ։ 2020 թվականի դեկտեմբերի 19-ին, երբ Նիկոլ Փաշինյանը սևեռված գնում էր «Եռաբլուր», հիշում եք, որ այնտեղ ընդդիմադիրներից մի քանիսին ծեծի ենթարկեցին, քթից և շուրթից արյուն էր հոսում, դա արյունահեղություն չէ՞ր։ Սրանց ձեռնտու չի ունենալ հասարակության մեջ մեզ պես մարդիկ։

Իրենց պետք է անորոշ, գորշ մթնոլորտ, որ իրենց գորշությունն ակնհայտ և ցցուն չկարողանանք դարձնել»,- նշեց Շիրինյանը։

Անդրադառնալով իր վերաբերյալ քրեական գործին՝ Սայաթ Շիրինյանը պատմեց, որ մինչև ոստիկանության աշխատակցի հաղորդում ներկայացնելը, վերջինս զանգահարել է Շիրինյանին և խնդրել, որ նա հեռացնի Փաշինյանին վերաբերող գրառումը։

«Ասում է՝ ձեզ ճանաչում եմ, գիտեմ ձեր սկզբունքայինությունը, բայց Փաշինյանի վերաբերյալ գրառում կա, խնդրում եմ ձեզ այդ գրառումը հեռացրեք։ Քանի որ խնդրանքը շատ տևական հնչեց, ես ասացի՝ լավ, այս մի գրառումը կհեռացնեմ, բայց այսուհետ հիշիր և հանկարծ ինձ չփորձես զանգահարել։ Սրանք էն են, որ ինչ հանձնարարություն տալիս են, ասում են՝ ես կանեմ, հետո ընկնում են կրակը, գալիս են դատարանի դահլիճ, ողորմելի հորթուկի նման են կանգնում, բա Ոստիկանության բաժնի պետն այսքան չիմացությամբ, մասնագիտությամբ իբրև իրավաբան, սենց խեղճ ու կրակ վիճակի մեջ պետք է հայտնվե՞ր»,- ասաց Շիրինյանը։

Նա հերթական անգամ կրկնեց, որ ոչ մի կերպ իրեն լռեցնել չեն կարող․ «Ինձ հետ կապված որևէ խնդիր չի կարող լինել․ ուզում են՝ ջազվա կապել, ուզում են՝ լվացքի մեքենա, ուզում են՝ մսաղաց»,- նկատեց Շիրինյանը։