Իշխանությունը դրանով ընդունում է՝ Հայաստանը ձեռքերը լվացել է Արցախից. Վարդևանյան (տեսանյութ)

Գնում եք դելիմիտացիա անելու մի երկրի հետ, որն էթնիկ զտման քաղաքականություն է վարում, գազ է անջատում: Այս մասին այսօր ԱԺ-ում լրագրողների հետ զրույցում ասաց «Հայաստան» խմբակցության պատգամավոր Արամ Վարդևանյանը։

Նրա գնահատմամբ` Բրյուսելում Փաշինյան-Շառլ Միշել-Ալիև եռակողմ հանդիպումից հետո արված հայտարարությունն ունի մի քանի մասշտաբային թերություն։

«Ինչպես է ստացվում, որ ՀՀ իշխանությունները խոսում են Արցախում հումանիտար աղետի մասին, դրանից հետո ոչ մի բան անգամ չի հիշատակվում այդ 4 ժամ տված քննարկումից հետո ծնված հայտարարության մեջ»,- նկատեց Արամ Վարդևանյանը։

Ըստ պատգամավորի՝ եթե չի խոսվում այն մասին, որ Ադրբեջանի քաղաքականությունը էթնիկ զտման քաղաքականություն է Արցախում, ուրեմն Հայաստանը դա չի պաշտպանել։

Նա նաև անընդունելի է համարում այն, որ հայտարարության մեջ խոսվում է սահմանների դեմարկացիայի և դելիմիտացիայի մասին։

«Ինչո՞վ է պայմանավորված, որ մենք խոսում ենք դեմարկացիայի և դելիմիտացիայի մասին։ Այսինքն՝ գնում եք դեմարկացիա, դելիմիտացիա անելու մի երկրի հետ, որն էթնիկ զտման քաղաքականություն է իրականացնում Արցախում, որն ընդհուպ գազ է անջատում, որ մարդկանց հոգեբանորեն ահաբեկի, որը մինչ օրս զինված գործողություններ է անում Արցախում։ Այս իշխանությունները չե՞ն նկատում, որ մի քանի օր առաջ հերթական անգամ զոհեր ենք ունեցել։ Այդ պայմաններում ո՞ւր ես գնում դեմարկացիա, դելիմիտացիա անելու»,- ասաց Արամ Վարդևանյանը։

Նա ընդդծեց, որ բրյուսելյան հանդիպումից հետո արված հայտարարության տեքստում չկա նաև ԵԱՀԿ Մինսկի խմբի համանախագահություն բառերը։

Ըստ նրա, այստեղ դրական որևէ բան չկա, հակառակը՝ անհանգստության առարկա է տեսնում, պետք է հաշվի առնել, թե ում հետ ես բանակցում, ինչպիսի վարքագիծ է դրսևորում։