Նիկոլը որտեղ էլ գնա, խնդիրը զիջելն է, զիջել այնքան, ինչքան պետք է իր իշխանությունը երկարաձգելու համար․ Աննա Մկրտչյան (տեսանյութ)

Բոլոր այն մտավախությունները, որոնք կային, որոնք մեր հանրահավաքի ժամանակ բարձրաձայնվել են, ցավոք սրտի, դարձան իրականություն: Այս մասին, այսօր՝ ԱԺ-ում լրագրողների հետ զրույցում ասաց «Պատիվ ունեմ» խմբակցության պատգամավոր Աննա Մկրտչյանը՝ անդրադառնալով Փաշինյան-Միշել-Ալիև Բրյուսելի եռակողմ հանդիպմանը։

«Այն հայտարարությունը, որը կա, վկայում է այն մասին, որ դա կլինի գրավոր, թե բանավոր, միևնույն է՝ Հայաստանի շահը չի պաշտպանվում: Միևնույն է՝ Նիկոլը որտեղ էլ գնա, խնդիրը զիջելն է, զիջել այնքան, ինչքան պետք է իր իշխանությունը երկարաձգելու համար: Գնալ Բրյուսել և չխոսել, չստանալ գրավոր տեքստ, որ հայ ռազմագերիների հետ կապված, այն անօրինական դատավճիռների հետ կապված, որոնք Բաքվում կայացվում են ՀՀ քաղաքացիների նկատմամբ, նշանակում է մեկ բան՝ չունենալ այնտեղ ներկայացուցիչ, չունենալ այնտեղ մարդ, որը քո երկրի շահերն է պաշտպանում»,- ասաց պատգամավորը:

Աննա Մկրտչյանը նկատեց, որ հանդիպումից հետո տարածած հայտարարության մեջ չկա Արցախի մասին որևէ խոսք ու չի նշվում, թե որտեղ է Հայաստանի շահը։

«Այնտեղ խոսքը հետևյալի մասին է. եկեք ափալ-թափալ տարածքային ամբողջականության հարցը լուծենք, եկեք տեսեք, թե ինչ է մեզնից պետք՝ ստացեք․ սրա մասին էր Բրյուսելը: Ափալ-թափալ տեսնենք՝ ում ինչ է պետք, միայն ինքը չունենա անհրաժեշտություն պաշտպանելու հայկական շահը»,- ասաց Աննա Մկրտչյանը։