Բանակը չի ենթարկվում Արցախին․․․ Սամվել Բաբայանը չհասցրեց պատասխանել հարցին, նրան «փրկության հասավ» Անդրանիկ Քոչարյանը

Ես աշխատանքային եմ եկել ու հարցերին չեմ պատասխանում։ Այս մասին Ազգային ժողովում ասաց Արցախի անվտանգության խորհրդի նախկին քարտուղար Սամվել Բաբայանը։

Սամվել Բաբայանին վրդովվեց լրագրողի այն հարցը, թե ինչպես կարող էր Բաբայանը որպես փորձագետ ընդգրկվել քննիչ հանձնաժողովի կազմում, երբ պատերազմի ժամանակ պաշտոն էր զբաղեցնում։

«Ինչքան ես ձեզ բացատրեմ, ես պատերազմի ժամանակ պաշտոն չեմ զբաղեցրել, բանակը չի ենթարկվում Արցախին»,- ասաց Բաբայանը և հեռացավ։

Դիտարկմանը, թե թշնամին շարունակում է մեզ հետ ուժի լեզվով խոսել, Սամվել Բաբայանը նետեց, թե՝ «Ես ձեզ այն ժամանակ էի ասում՝ բանակ պահեք, որ թշնամին մեզ հետ ուժի լեզվով չխոսի»:

Լրագրողի հարցին, թե դուք կարծում եք՝ մենք բանակ չունե՞նք, Բաբայանը չհասցրեց որևէ բան արձագանքել, քանի որ նրան «փրկության» հասավ հանձնաժողովի նախագահ Անդրանիկ Քոչարյանը և թևից բռնելով՝ ներս տարավ։

Մնում է թարմացնել բոլորի հիշողությունները՝ նշելով, որ Սամվել Բաբայանը 2020 թվականի մայիսի 29-ին նշանակվել է Արցախի Անվտանգության խորհրդի քարտուղար։ Այդ պաշտոնից հրաժարվել է 2020 թվականի նոյեմբերի 10-ին։