Աղջիկն 8-րդ հարկից ընկնելիս պոկել է լվացքի պարանները և ողջ մնացել

Երեկ՝ հունվարի 3-ին, ժամը 23:00-ի սահմաններում ոստիկանության Արաբկիրի բաժին ահազանգ է ստացվել, որ Վ. Համբարձումյան փողոցի թիվ 47 բարձրահարկի բակում երիտասարդ աղջիկ է ընկած:

Նշված վայր է ժամանել ոստիկանության Արաբկիրի բաժնի օպերատիվ խումբը: Փրկարարներն ու ոստիկանները շենքի բակում հայտնաբերել են նույն շենքի 8-րդ հարկի բնակչուհի, 24-ամյա Անի Հայրապետյանին: Նրան շտապ օգնության ավտոմեքենան ծայրահեղ ծանր վիճակում տեղափոխել է Հերացու անվան հիվանդանոց:

Անի Հայրապետյանն ստացել է ողնաշարի կոտրվածք: Աղջիկն ընկնելու պահին պոկել է լվացքի մի քանի պարաններ և ողջ է մնացել, երբ ընկել է ձնակույտի մեջ: Փաստի առթիվ ոստիկանության Արաբկիրի բաժնի հետաքննիչ Արա Գևորգյանի կողմից նյութեր են նախապատրաստվում: Տեղի ունեցածը ինքնասպանություն է, թե դժբախտ պատահար, պետք է պարզվի հետաքննության ընթացքում:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Նյութի սկզբնաղբյուր` shamshyan.com