Ուկրաինան մտադիր չէ կատարել Ժնևյան կոնվենցիան՝ ռազմագերիների նկատմամբ վերաբերմունքի հարցով. ՌԴ արտաքին հետախուզության ծառայության մամուլի գրասենյակ

ՌԴ արտաքին հետախուզության ծառայության մամուլի գրասենյակը հայտնում է՝ Ուկրաինայի իշխանությունները Բրիտանիայի արտգործնախարարությանը տեղեկացրել են, որ մտադիր չեն կիրառել ռազմագերիների նկատմամբ վերաբերմունքի մասին Ժնևյան կոնվենցիայի դրույթները:

«Ուկրաինայի ղեկավարությունը Մեծ Բրիտանիայի արտաքին քաղաքական գերատեսչությանը իրազեկել է, որ մտադիր չէ կատարել Ժնևյան կոնվենցիան՝ ռազմագերիների նկատմամբ վերաբերմունքի հարցով։ Գերեվարված ռուս զինծառայողներին, որոնցից շատերը վիրավոր են, նրանք չեն նախատեսում բավարար չափով սնունդ և անհապաղ բուժօգնություն տրամադրել՝ պատճառաբանելով, որ «այժմ դրանցից զրկված են շատ ուկրաինացիներ»,- նշված է հաղորդագրությունում։

ՌԴ արտաքին հետախուզության ծառայության մամուլի գրասենյակը հայտնել է նաև, որ ռուս զինծառայողների խոշտանգումների մասին տեսանյութի տարածումից հետո Ուկրաինան ջանքեր է գործադրում դաժան վերաբերմունքի փաստերը թաքցնելու համար։

«ՌԴ արտաքին հետախուզության ծառայություն են հասնում հավաստի տեղեկություններ այն մասին, որ Ուկրաինայում գերի ընկած ռուս զինծառայողների խոշտանգումների ցնցող տեսանյութերի հրապարակումից հետո Կիևի ազգայնական ռեժիմը ջանքեր է գործադրում նման փաստերի հետագա բացահայտումը կանխելու համար։ Կան հստակ տեղեկություններ, որ ուկրաինական իշխանություններն իրենց արևմտյան հովանավորներին կոչ են անում ԿԽՄԿ-ին և զանազան միջազգային մարդասիրական ՀԿ-ին դրդել, որ վերջիններս հրաժարվեն ռուս զինծառայողներին այցելելու թույլատվություն ստանալու փորձերից»,- նշված է հաղորդագրությունում։