Տիկին Խամոյան, դուք անվտանգության հա՞րցն էիք քննարկում, մենք էլ ձեզ կտրել֊բերել ենք ասել` ՏԻՄ հարց ենք հրատապ քննարկո՞ւմ․ Ռուբեն Ռուբինյան (տեսանյութ)

Ե՞րբ բերեցիք այլընտրանքային նախագիծ, որ մենք չքննարկեցինք։ Այս մասին ԱԺ-ում հայտարարեց Ազգային ժողովի նախագահի տեղակալ Ռուբեն Ռուբինյանը՝ արձագանքելով «Հայաստան» խմբակցության պատգամավոր Ագնեսա Խամոյանի հարցադրմանը, թե ՝ Ադրբեջանի հարձակումն անխուսափելի է, իսկ ՔՊ-ն որպես հրատապ հարց, ՏԻՄ նախագի՞ծն է բերում  քննարկման։

«Տիկին, Խամոյան, դուք անվտանգության հա՞րցն էիք քննարկում, մենք էլ ձեզ կտրել֊բերել ենք ասել` ՏԻՄ հարցն ենք հրատապ քննարկո՞ւմ։ Այլընտրանքային հարց բերեիք՝ կքննարկեինք»,- ասաց Ռուբինյանը։

Նա նաև նկատեց, որ «Հայաստան» և «Պատիվ ունեմ» խմբակցությունների գործընկերներին առաջարկում է Նիկոլ Փաշինյանի մասնակցությամբ փակ աշխատանքային քննարկում կազմակերպել Ազգային ժողովի խորհրդի ֆորմատով, որում կքննարկվեն երկրի անվտանգային հարցերը:

«Երեկ «Հայաստան» խմբակցության գործընկերների հետ քննարկումների արդյունքում, նաև քննարկելով վարչապետի հետ, ես «Հայաստան» խմբակցությանն առաջարկել եմ կազմակերպել փակ աշխատանքային քննարկում վարչապետի և ընդդիմադիր խմբակցությունների մասնակցությամբ: Մեր ընդդիմադիր գործընկերներն ինձ ասել են, որ այդ ձևաչափն այդքան էլ ընդունելի չէ: Կրկին վարչապետի հետ քննարկելով՝ ես արել եմ երկրորդ առաջարկը` կազմակերպել փակ աշխատանքային քննարկում Ազգային ժողովի խորհրդի ձևաչափով, որում ներառված են նաև ընդդիմադիր գործընկերները երկու խմբակցություններից: Ո՛չ դրական, ո՛չ բացասական պատասխան այս պահի դրությամբ չեմ լսել»,- ասաց Ռուբինյանը։

Նա հայտարարեց, որ պատրաստ են հարցի հրատապ քննարկմանն ու ակնկալում է ընդդիմության պատասխանը։