Եթե չեն կարողանում մաքրել դատական համակարգը՝ զիբիլի վեդրո ու ավել բերեմ՝ թափենք զիբիլանոց․ չեն աշխատում՝ աշխատավարձ են բարձրացնում․ զոհվածի հայր (տեսանյութ)

Խաղաղ պայմաններում զոհված ժամկետային զինծառայող Արման Մուրադյանի հայրը՝ Հովսեփ Մուրադյանը, շարունակում է պնդել, որ իր որդուն սպանել են ու գործը չեն ուզում բացահայտել։

Նա NEWSPRESS.am-ի հետ զրույցում պատմեց, որ տղան զորակոչվել է բանակ 2011 թվականին։ 2012-ից տեղափոխվել է Մարտակերտ, ծառայել ԼՂ բանակում: 

2013-ի հուլիսի 30-ին Արամի դին հայտնաբերվել է դիրքերում՝ հրազենային վնասվածքով: Արմանի ծնողներին հայտնել են, թե իրենց որդին ինքնասպան է եղել, բայց նրանք չեն հավատում այդ վարկածին ու պնդում են, որ որդուն սպանել են:

Տարիներ շարունակ գործը կոծկել են, ու թեև նոր իշխանությունը հույս արթնացրեց, սակայն, ինչպես հետո պարզ դարձավ, գործը, շղթայական փոխանցումներով, այդպես էլ չբացահայտվեց։

Իրարամերժ վճիռներ են կայացվել գործի առնչությամբ, որոնց համաձայն՝ նախ ասել են, որ հանցակազմ կա նշված գործով, ապա հերքել են, հետո նորից հաստատել ու դարձյալ հերքել։

Գործը կարճել են։ Ու թեև Հովսեփ Մուրադյանը բողոքարկել է, սակայն արդյունք չի եղել։ Այժմ նա վճռական է տրամադրված՝ գնալու է մինչև վերջ։

«Արդարադատության նախարարին եմ հանդիպելու՝ Կարեն Անդրեասյանին, ասելու եմ՝ եթե ուզում եք մաքրել համակարգը՝ մաքրեք, եթե պետք է՝ զիբիլի վեդրո ու ավել էլ կբերեմ, տանենք թափենք Սովետաշենի զիբլանոց։ Եթե չեն աշխատում՝ էլ ինչի համար են աշխատավարձ բարձրացնում»,- ասաց զոհվածի հայրը։

Մանրամասները՝ տեսանյութում