Վարչապետն ասաց՝ փաստերը հանեք, մտցրեք աչքս, տեսեք, թե ինչ եմ անելու․ փաստերը հենց իրենք հանեցին, բայց ոչ մի բան չեն անում․ որդեկորույս ծնողների ակցիան (տեսանյութ)

Խաղաղ պայմաններում զոհված զինծառայողների ծնողները, 2 տարվա ընդմիջումից հետո, դարձյալ կառավարության դիմաց արդարություն են պահանջում։

NEWSPRESS.am-ի հետ զրույցում նրանք նշեցին, որ այս ընթացքում կորոնավիրուսի վարակն էր, հետո պատերազմ՝ չեն եկել կառավարության մոտ, բայց դատական որոշ գործընթացներ են անցել, որոնք ևս ոչ մի արդյունք չեն տվել։

Զոհված զինծառայող Վալերի Մուրադյանի մայրը՝ Նանա Մուրադյանը, նկատում է, որ շղթան պտտվել ու եկել նույն տեղում կանգնել է, որովհետև նոր քննիչն իր գործընկերոջ կեղծած գործը չի բացահայտի։

«Վարչապետն ասաց՝ փաստերը հանեք, մտցրեք աչքս, տեսեք, թե ինչ եմ անում․ փաստերը հենց իրենք են հանել, շատ լավ, մանրակրկիտ ուսումնասիրել են գործը, որի համար շատ շնորհակալ ենք, բայց նորից ոչ մի բան չի արվում»,- ասում է Նանա Մուրադյանը։

Նա նկատում է, որ շնորհակալ են մինչ այս պահը կատարած գործի համար, բայց շարունակություն է պետք։ Երբ այս մասին ծնողները բարձրաձայնել են՝ նրանց ասել են, թե «չեք ուզում՝ չշարունակենք»։

«Ինչ է՝ շանտա՞ժ են անում, ի՞նչ է նշանակում՝ չշարունակենք»,- մեզ հետ զրույցում ասաց Նանա Մուրադյանը։

Զոհված Տիգրան Օհանջանյանի մայրն էլ՝ Գոհար Սարգսյանը, հիշեցնում է՝ 2 շաբաթ առաջ էլի զինվորների ինքնասպանություններ եղան զորամասում։ Նա վստահեցնում է, որ եթե բացահայտվեին այդ գործերը, գոնե կկանխվեր խաղաղ պայմաններում զինվորների սպանությունները։ Մինդեռ 10 տարի գործը «ֆռացնում, ու ոչինչ չեն անում»։

Զոհված զինվոր Արթուր Ղազարյանի մայրը՝ Իրինա Ղազարյանը, ավելացնում է․ «Մեր տղաները հրամանատարների պատճառով են մահացել»։ Նա մեզ հետ զրույցում նաև անուններ նշեց։

Մանրամասները՝ տեսանյութում