Հարավային Օսիան պատրաստվում է իրավական քայլեր ձեռնարկել` Ռուսաստանի կազմ մտնելու համար. Բիբիլով

Հարավային Օսիայի Հանրապետությունը մոտ ապագայում իրավական քայլեր կձեռնարկի Ռուսաստանի Դաշնությանը միանալու համար, հայտարարել է հանրապետության նախագահ Անատոլի Բիբիլովը, ում խոսքը մեջբերում է «Եդինայա Ռոսիա»-ի մամուլի ծառայությունը։

«Կարծում եմ, որ Ռուսաստանի հետ միավորումը մեր ռազմավարական նպատակն է: Մեր ճանապարհը, ժողովրդի ձգտումները: Եվ մենք այս ճանապարհով ենք շարժվելու: Մոտ ապագայում մենք համապատասխան իրավական քայլեր կձեռնարկենք: Հարավային Օսիայի Հանրապետությունը կլինի մեր պատմական հայրենիքի` Ռուսաստանի մի մասը»,- ասել է նա:

Նա հավելել է, որ այժմ Հարավային Օսիան, Ռուսաստանը և ողջ աշխարհը «շրջադարձային պահ են ապրում»։ «Ռուսական աշխարհն այսօր պաշտպանում է նրանց շահերը, ովքեր հավատարիմ են դրան, նրանք, ովքեր դեմ են նացիզմին, հարգում են համընդհանուր մարդկային արժեքները և հիմնարար իրավունքներն ու նորմերը, որոնք ընդունված են ողջ միջազգային հանրության կողմից»,- ասել է Բիբիլովը:

Նրա խոսքով` նորագույն պատմության մեջ ռուսական աշխարհի առաջին վերածնունդը տեղի է ունեցել Հարավային Օսիայում 2008 թվականին, երբ Ռուսաստանը որոշեց ճանաչել հանրապետության անկախությունը։ «Դա պատմական որոշում էր, որը Հարավային Օսիայի ժողովրդին տվեց խաղաղության երաշխիքներ և զարգացման հնարավորություններ: Այնուամենայնիվ, օս ժողովրդի՝ պառակտված ժողովրդի գլխավոր պատմական, ռազմավարական նպատակը միավորումն է մեկ պետության շրջանակներում: Մեր ժողովուրդը բազմիցս նշել է այդ նպատակը»,- ​​հավելել է Հարավային Օսիայի նախագահը։