Նժդեհը մի բան ապացուցեց՝ «Քո գլխի տերը դու ես» և այդ կերպ կարողացավ պահել Զանգեզուրը. Ռուբիկ Հակոբյան (տեսանյութ)

«Չեմ կարող պաշտպանության նախարարի մասին չասել, որ հերթական պատուհասն է: Ես չգիտեմ` որտեղի՞ց են նմաններին պեղում, գտնում և նշանակում պատասխանատու պաշտոններին»: Այս մասին հայտարարեց ԱԺ նախկին պատգամավոր Ռուբիկ Հակոբյանը:

Հիշեցնելով, որ Սուրեն Պապիկյանը բանակում ծառայած ժամանակ դանակահարության համար դատապարտվել է՝ բանախոսն ասաց, որ հիմա էլ նրան բերել են, որ փորձի փոխանակում կատարի ՀՀ ԶՈւ զինվորների հետ:

Ռուբիկ Հակոբյանի խոսքով՝ արցախյան վերջին դեպքերի առիթով ՄԱԿ-ը շատ վատ հայտարարություն տարածեց՝ հավասարության նշան դնելով երկու կողմերի միջև, իսկ Մինսկի խումբն վաղուց արդեն արհամարհում է ՀՀ իշխանություններին:

Մինսկի խմբի վերաբերմունքը ՀՀ գործող իշխանությունների նկատմամբ Հակոբյանը բացատրեց այն հանգամանքով, որ իշխանության գալով` Նիկոլ Փաշինյանը հայտարարեց, թե բանակցությունները սկսում է իր կետից, ինչը խաթարեց այդ կառույցի վստահությունը Հայաստանի հանդեպ:

«Մինսկի խումբը չի վստահում այսօրվա իշխանությանը, դրա համար էլ իրեն չեզոք է պահում»,- ասաց ԱԺ նախկին պատգամավորը:

Նրա կարծիքով՝ ստեղծված իրավիճակում միջազգային կառույցներից ակնկալիքներ չպետք է ունենալ և հույսը պետք է դնել սեփական կարողությունների վրա:

«Նժդեհը մի բան ապացուցեց՝ «Քո գլխի տերը դու ես» և այդ կերպ կարողացավ պահել Զանգեզուրը, որովհետև հասկացավ, որ ոչ մեկն իրեն չի օգնի: Այսօր մենք ապրում ենք այդ իրականության մեջ»,- հայտարարեց Ռուբիկ Հակոբյանը: