Խոսում են Սյունիքի, Երևանի մասին և փորձում կասկածի տակ դնել հայկական լինելը. դրա համար պետք է ենթարկվեն քրեական հետապնդման․ Արամ Վարդևանյան

ԱԺ-ում «Հայաստան» խմբակցության պատգամավոր Արամ Վարդևանյանը ներկայացրեց Իշխան Սաղաթելյանի և Աղվան Վարդանյանի հեղինակած օրենսդրական նախաձեռնությունը, ըստ որի առաջարկվում է քրեական պատասխանատվություն Հայաստանի Հանրապետության տարածքի կամ դրա մասի նկատմամբ ինքնիշխանությունից հրաժարվելուն կամ այն սահմանափակելուն ուղղված հրապարակային արտահայտությունների համար։

Ներկայացնելով նախագիծը` Արամ Վարդևանյանը նկատեց, որ այն լինելու է ՀՀ տարածքից դուրս գտնվող մարդկանց իրապես հետապնդելու և նրանց կողմից թույլ տրվող արտահայտություններն անհետևանք չթողնելու մասին։ 

«Մենք տեսել ենք, թե ինչպես ՀՀ հարևան՝ իրականում թշնամի երկրի ռազմաքաղաքական ղեկավարությունը ինչպիսի արտահայտություն է իրեն թույլ տալիս․ խոսում են Սյունիքի մասին, խոսում են մեր Երևան քաղաքի, մեր Սևանի մասին և իրենց զառանցանքների պայմաններում փորձում այդ ամենը, ՀՀ պատկանելության տեսանկյունից, կասկածի տակ դնել։

Կարծում ենք՝ սա լավ հնարավորություն կլինի նման արտահայտություններ թույլ տվողներին, որոնք կգտնվեն ՀՀ տարածքից դուրս, ենթարկելու քրեական հետապնդման։ Այս գործիքը թույլ կտա հետախուզում հայտարարել նման արտահայտություններ թույլ տվող անձանց նկատմամբ»,- ասաց Վարդևանյանը։

Նրա խոսքով՝ այսօրվա քրօրենսգիրքը նման արտահայտությունները քրեորեն հետապնդելի արարք չի համարում, կոչերը որոշակիորեն համարում է, բայց ոչ այն տրամաբանությամբ, որով իրենք են առաջարկում։