Եթե կան կարմիր գծեր` ասեք դրանց մասին, սա Ձեր և Չավուշօղլուի անձնական խնդիրը չէ, սա մեր երկրի անվտանգության հարցն է. Քրիստինե Վարդանյանը՝ ԱԳ նախարարին

Հայաստան-Ադրբեջան խոսակցությունում Ձեզ համար «կարմիր գծեր» կա՞ն։ Այս հարցադրմամբ դիմեց ԱԺ «Հայաստան» խմբակցության պատգամավոր Քրիստինե Վարդանյանն ԱԳ նախարար Արարատ Միրզոյանին:

Նա նշեց, որ ի տարբերություն մեզ` թշնամական կողմը իր կարմիր գծերի մասին վաղուց հայտարարել է: 

«Պարզ է՝ դուք խորհրդարանում ունեք մեծամասնություն, բայց մեր կյանքը պայմանավորելու է այն գործընթացը, որի մեջ եք Դուք, որի կենտրոնական դիրքերում եք Դուք։ Էրդողանն ու Չավուշօղլուն պարբերաբար հայտարարել են, որ հայ-թուրքական հարաբերություններում իրենց դիրքորոշումները և տեսակետները համադրում են Ադրբեջանի հետ և Ադրբեջանի, այսպես ասած, դաբրոյով են գործում։ Երբ մտնում եք բանակցելու Թուրքիայի հետ, կա՞ արդյոք այս գիտակցումը, թե՞ ձեզ համար սրանք ինչ-որ հայտարարություններ են, կարևորություն չեն ներկայացնում»,- հարցրեց պատգամավորը։

Արարատ Միրզոյանի նկատեց, որ Արցախի անվտանգությունը մեծապես կախված է այն բառերից, որ ԱԺ-ում կարող են թույլ տալ բարձրաձայն ասել։

«Կարմիր գծեր, անշուշտ կան, ես չեմ կարող պատկերացնել՝ ինչպես կարող է նման հարց ծագել»,- հավելեց նա։

«Եթե կան կարմիր գծեր` ասեք դրանց մասին, սա Ձեր և Չավուշօղլուի անձնական խնդիրը չէ, սա մեր երկրի անվտանգության հարցն է»,- նշեց Քրիստինե Վարդանյանը։