Պողպատե չագուչ բռնող, մատ թափ տվող, ստում ես, լկտիաբար ստում ես, այն էլ՝ հերթական անգամ. Գասպարյանը՝ Փաշինյանին

Հայաստանի ամբողջ քաղաքական համակարգը կանգնած է օրակարգային դեֆոլտի առաջ: Կուսակցությունները դժվարանում են նոր խոսք ասել, պետությունը սպառել է մարտահրավերները ձևակերպելու և հաղթահարելու երբեմնի կարողությունը: Հանրությունը հիասթափված է, բայց ունի ակնկալիքներ: Այսօր ԱԺ-ում ելույթ ունենալու ժամանակ ասաց վերլուծաբան, հեռուստամեկնաբան Աբրահամ Գասպարյանը: 

Նրա խոսքով՝ նման թեմաներով լսումներ կազմակերպելն անխոս կունենա դրական արդյունք, իսկ մեր հայրենակիցներն էլ հնարավորություն կունենան լսելու այն մտահոգություններն ու վտանգները, որոնք սպառնում են հայկական զույգ պետություններին: Գասպարյանն առանձնացրել էր երեք հարց:

1.  Ինչպե՞ս տապալվեց մեր պետությունն ու ինչո՞ւ հայտնվեցինք փակուղում: 
2.  Ինչպե՞ս ձևակերպել դիվանագիտական խնդիր և նպատակ, դուրս գալ ստեղծված վիճակից:
3. Ինչպե՞ս փոխակերպել գործող իշխանության պարտվողական դիրքերն ու հայտնվել դիվանագիտորեն շահեկան դիրքերում:

«Եթե 20-րդ դարում դիվանագիտական և ռազմական, անվտանգային քաղաքականությունն իրականացվում էր փափուկ և կոշտ ուժի միջոցով, ապա նոր տասնամյակի մարտահրավերները չեն կարող հաղթահարվել առանց խելացի ուժի: Հայաստանի դիվանագիտությունը, որի մտքի սնանկությանը պարտական ենք գործող իշխանությանը, պետք է ունենա խելացի դիմագիծ, այսինքն՝ դիվանագիտությունը պետք է ունենա ռազմավարական հայեցակարգային հենք, խորություն, պիտի ձևակերպի օրակարգ, սահմանի խնդիր ու նպատակ, կարողություններ ստեղծի, ապա այդ ամենը վերածի ազդեցության»,- ասաց Գասպարյանը:

Նա, անդրադառնալով ժողովրդավարությանն ու ժողովրդավարական արժեքներին, նշեց. «Պողպատե չագուչ բռնող, մատ թափ տվող, հսկա ջարդող հայտնի անձնավորությունը, կառավարության նիստում հայտարարեց, որ Հայաստանը մտել է ժողովրդավարական երկրների բարձրագույն լիգա: Ես ուսումնասիրել եմ հայտնի կազմակերպություններից մեկի հետազոտությունը և պաշտոնապես հայտարարում եմ՝ ստում ես, լկտիաբար ստում ես, այն էլ՝ հերթական անգամ»,- ասաց Աբրահամ Գասպարանը: