Սպառնալիքները ՀՀ հանդեպ օր-օրի աճում են` ունենք մեկ այլընտրանք. ռազմական փորձագետ (տեսանյութ)

Սպառնալիքները մեր երկրի նկատմամբ օր-օրի աճում են։ Այս մասին Ռուսաստան-Արևմուտք հակամարտությունը. մեր տեղը նոր աշխարահակարգում թեմայով համաժողովի ժամանակ ասաց ռազմական փորձագետ, պահեստազորի գնդապետ Հայկ Նահապետյանը:

Փորձագետի ներկայացմամբ, Ուկրաինայի տարածքում Ռուսաստան-ԱՄՆ հակամարտությունը կարելի է բնութագրել երեք բաղադրիչներով՝ իրավական, բարոյական, անվտանգային։

«Նշված երեք վահաններով Հայաստանն ունի պարտավորություն և իրավունքներ։ Բացի այդ՝ Հայաստանը ԵԱՏՄ անդամ երկիր է։ Եթե Հայաստանը չի կատարում այդ պարտականությունները, ինքնին արդեն իսկ խնդիրներ են առաջանում մեր պետության, մեր երկրի քաղաքացիների հետ կապված»,- ասաց Հայկ Նահապետյանը։

Փորձագետի խոսքով՝ եթե Հայաստանի իշխանությունը, այնուամենայնիվ, փորձելու է խաղալ կամ իրականացնել «և-և»-ի կամ կոմպլիմենտար քաղաքականություն, ապա պետք է հաշվի առնել, որ սպառնալիքները ՀՀ հանդեպ օր-օրի աճում են, բազմապատկվում են։ Հաշվի առնելով ստեղծված իրավիճակը` փորձագետը նկատում է, որ մենք այլընտրանք չունենք։

«Անկախ նրանից դա լավ է, թե վատ է, ճիշտ է, թե սխալ, ունենք մեկ այլընտրանք և այն պայմանագրային պարտավորությունները, որոնք Հայաստանն ունի Ռուսաստանի հանդեպ, դրանք պետք է ավելի խորացվեն և այդ խորացման միակ ճանապարհը Ռուսաստան-Բելառուս միասնական պետությունը, ինչու չէ անհրաժեշտության դեպքում նաև նոր առկա իրողությունները հաշվի առնելով Ռուսաստանի հետ ռազմական կամ ռազմատեխնիկական համագործակցության նոր որակի պայմանագրեր կնքելն է»,- ասաց Նահապետյանը։